SALIÓ DERROTÁU DEL VESTUARIU.- Nun ye que’l Real Madrid perdiere, una vuelta más, un partíu importante escontra’l so eternu rival, el Barcelona, ye que nesta ocasión l’equipu blancu yá salió derrotáu del vestuariu. Un equipu grande, como se farten de dicir los propios madridistes, nun pue salir a xugar nel so estadiu con un equipu atarraquitáu de defensores. Eso paez más propio de los equipos modestos que traten, namás, de que nun-yos metan una «goxada». Pero ye que, amás, l’alliniación de Mouriño nin siquier yera intelixente, con una montonera xugadores atrás, un centru’l campu que nun esistía, y tres grandes xugadores alantre a los que nun-yos llegaben más que pelotazos pa correr. Con xugadores fuera del so puestu y otros que llevaben meses ensin xugar. Un desastre. Y un últimu apunte: el meyor centrocampista que tienen los blancos, Xabi Alonso, necesita espacios pa movese y mover el balón, nun pue xugar constreñíu por dos compañeros que nun falen el mesmu llinguax qu’él. Asina ye un fracasu. Y gracies que’l Barsa, que siempre sabe a qué xuega, tampoco nun tuvo un día mui inspiráu, porque sinón… Capítulu aparte pa esi tal Pepe que, al marxe de la so consideración como xugador, ye un «canalla» dientro’l campu, dispuestu a lesionar al contrariu como signu d’impotencia. El propiu R. Madrid tendría que lu castigar.
YÁ LO LLOGRARON.- Los corruptos del casu Gürtel. Los abogaos de los corruptos del casu Gürtel. Los resentíos de la
xudicatura. Los envidiosos del protagonismu del so compañeru. Los restos (abondos) de xueces franquistes. Los periodistes difamatorios y fachosos… Yá llograron el so oxetivu: sentar nel banquín de los acusaos al xuez Garzón. Yá dixi n’otres ocasiones que nun me presta esi «álitu» glamourosu que, dacuando, acompaña al xuez, pero eso nun quita pa reconoce-y la so valentía y profesionalidá n’intentar que naide s’escape de la xusticia, nin anque se pudiere llamar Pinochet o Franco. Qu’agora se pretenda acusalu, na menos que de «prevaricación», da tola impresión que se trata d’una venganza. Habrá qu’esperar a ver qué decide’l tribunal que lu xulga pero, en cualquier casu, y anque resultare absueltu, los sos enemigos yá llograron lo que queríen: que pasare d’acusador a acusáu.
EL PARTÍU POPULAR DEPUÉS DE «PEREJIL».- Anduvo’l señor Rajoy per tierres marroquíes, cumpliendo’l ritual de la primer visita como Presidente, ritual entamáu por don Felipe González. Tenía curiosidá de sentir lo que dicía’l representante español, depués del ridículu fechu con aquello del «Islote de Perejil», pol caradura (y daqué más) de Federico Trillo y el so xefe Aznar. Rajoy salió contentísimu prometiendo-y al Rei de Marruecos «l’oru y el moru», anque’l moru nun facía falta. Y tampoco ye eso, nun hai que se pasar. Ta bien que agora seyan amigos, pero habrá que recorda-y al nuestru presidente qu’hai unes resoluciones de Naciones Xuníes que Marruecos tien que respetar, y que, como antiguu país colonizador, tenemos unes responsabilidaes col pueblu Saharahui de les que nun podemos abdicar. Que lo comente, de xemes en cuando, colos dirixentes del país vecín.
ALMODOVAR MUI BIEN INFORMÁU.- Préstame muncho saber que l’illustre direutor cinematográficu Pedro
Almodovar, pese a los munchos viaxes que fai y lo lloñe que suel tar de nós, ta perfeutamente informáu de lo que pasa en Xixón. El detalle de firmar el primeru en favor de José Luis Cienfuegos como direutor del Festival de Cine de Xixón, amuesa que ta al día na problemática cultural xixonesa. Que sabe lo que se cuez, vamos. Y ye que paez que fue siempre, en privao, un gran admirador del nuestru festival. Cosa que munchos ignorábemos y qu’agora podemos agradece-y. Nunca ye tarde.
