LES FOTOCOPIES, PA ELLOS.- Paez un poco de cachondeo, sinon fuere pola importancia que tien, la respuesta que’l Ministru de Cultura, José Ignacio Wert (el de los exemplos falsos pa xustificar la quita d’ Educación pa la Ciudadanía) dio al representante asturianu nel Senáu sobro los los documentos históricos de la Guerra Civil: «Que faigan fotocopies», vieno a dicir esi caradura, alegando que’l plazu pa lo so reclamación yá pasare. ¿Qué coime ye eso de que’l plazu de reclamación yá pasare, como si se tratare de pagar una multa o solicitar una subvención? Esos documentos pertenecen a Asturies. Unos son privaos y otros públicos, y yá que pasaron más de setenta años dende la fin de la guerra, ye absurdo qu’agora se nos diga que nos pasó’l plazu de reclamar. Améstase a ello que, como dio anuncia’l Conseyeru de Cultura señor Vallaure va un tiempu, hubo un engañu na llocalización d’esos importantes papelos, y se mintió, en documentu oficial, al negar el direutor d’Archivos, Rogelio Blanco al Gobiernu Asturianu que los documentos fueren treslladaos a Cataluña. Too ello ye un despropósitu de tal altor qu’habría que lo denunciar ante les instituciones que proceda. Too, menos quedase de brazos cruzaos viendo como s’espolia’l nuestru patrimoniu documental, en porgüeyu d’otres comunidaes con más poder políticu. Les fotocopies, si les quieren, pa ellos.
¿LES GÜELGUES PA CUÁNDO SON?.- La esterminadora Llei de Reforma «Contrallaboral», aprobada pol Parllamentu
español colos votos del PP, CIU y (¡güeyu, votantes asturianos!) Foro Asturies, ta siendo contestada na cai, como nun podía ser menos, porque supón la vuelta al capitalismu más selvaxe, dexando ensin abellugu a los trabayadores y desrregulando’l mercáu llaboral en porgüeyu de la CEOE. Cientos de miles de persones tán saliendo a manifestase a la so escontra, en preparación d’esa Güelga Xeneral anunciada pal 29 de marzo. Agora, dende diverses instancies del Gobiernu, del PP y de la prensa afín, nun paren de dicir que nun ye’l momentu de güelgues. Que nesta situación tán mala les güelgues nun tienen sentíu y son contraproducentes. El periódicu (?) «La Razón» llegó a titular: «¡Huelga contra España!», dando por sentao qu’España son ellos, y a lo meyor La Razón tien razón, y España son ellos y nosotros, como na Guerra Civil, somos la «antiespaña». Too esta campaña mediática pa descalificar a la Güelga Xeneral y desmovilizar a la ciudadanía ye un sinsentíu, porque les güelgues faense, precisamente, cuando les coses van mal. Cuando van bien nun fain falta güelgues. Recordemos que, por exemplu, a Felipe González ficiéronse-y tres. Pero esto, que paez de sentíu común, nun entra dientro los intereses políticos de los que manden, que quieren desmantelar l’estáu del bienestar y que, pa enriba, callemos la boca. Pues va vaga-yos.
LES GUERRES NEL MUNDU.- El fechu del asesinatu (nun pue llamase d’otru mou) de dieciseis persones, nueve d’elles neños, por parte d’un militar norteamericanu n’Afganistán, asoleya’l grau de descomposición d’estes fuerces militares espardíes pol mundu. Podría dicise que ye un casu aislláu, pero nun ye asina. La quema de llibros del Corán nuna base militar, el tratu inhumanu a munchos prisioneros, y los planes de posibles ataques a Irán xunto con Israel, amuesen la cara más violenta d’un réxime, el del presidente Obama, que llegó al poder con aliendu de pacifista. Llegó a comparáselu con Martín Luther King. La verdá ye que poco cambia, polo menos na política esterior, d’unos presidentes a otros. Por desgracia. Pola so parte, los sos aliaos sionistes siguen «buscando la paz» con nuevos asentamientos de colonos y colos misiles que disparen «seleitivamente». Deben seleicionar mal porque siguen morriendo escolinos. Y qué dicir del réxime siriu que, pese a la cantinela del restu los paises árabes y de la propia ONU, sigue esterminando al so propiu pueblu. Los vendedores d’armes siguen teniendo un negociu prósperu.
LA CLEMENTINA.- Non, nun falo de les naranxes, sinón de l’actitú que’l «mozu de Baracaldo», Javier Clemente,
llogró imponer al nuestru Sporting. Nun sé cómo acabará la cosa, igual baxamos a Segunda, pero nun hai dulda de que’l nuevu entrenador llogró dar al equipu una consistencia y una seriedá que con Preciado nun tenía. Paez que yá ta desinflándose un poco’l globu «preciadista». Yera un bon paisano, y llegaba a la xente, pero como entrenador, y esto ya lo dixi dende esti mesmu sitiu, nun tenía muncha idea. Agora, amás, enterámonos de que nun-y perdona al Sporting nin una peseta, incluyía la prima que-y correspondiere si se caltién la categoría. Ta nel so derechu, claro, pero entós que nun falemos de «amores al club». Otros, que marcharon pela puerta d’atrás y ensin reconocimientu públicu, renunciaron a cobrar una sola peseta a les que tenía derechu. Por exemplu, el chilenu Vicente Cantatore (2000-2001) al qu’echaron la SER y el d’aquella asesor xurídicu Viliulfo Díaz, qu’ésti si que denunció llueu al Sporting . Y ye qu’hai señores… y señores.
