close
Olivando

Olivando

2009-10-19318Visitas

NON MÁS «CASTILLOS DE SALAS».-prestige11

El Psoe estatal, en connivencia colos sos «fieles» de la FSA, quieren colanos «de rondón» el que’l puertu d’El Musel seya una especie de «vertederu» pa catástrofes marítimes. A eso llámenlo eufemísticamente «Puerto Refugio». Esti puertu siempre fue y siempre sedrá abellugu pa cualquier barcu y la so tripulación, que tuvieren en pelligru pol estáu de la mar (tormentes, etc.). Pero d’eso, a pretender camudanos en «paganinis» d’esos tráficos pelligrosísimos de petroleu, con unos barcos que nun reunen les más mínimes condiciones de navegabilidá, hai un abismu. Los xixoneses nun queremos más «Castillos de Salas», y si necesiten pagar «el favorín» de financiar el pufu qu’ellos mesmos crearon, que lo faigan d’otru mou. Los esperimentos con agua.

¡GALLEGU SÍ, PERO ASTURIANU NON!caamano

La cara dura del Psoe nun tien igua. Agora que tán na oposición en Galicia, sofiten una manifestación, xunto col Bloque, en defensa de la llingua gallega. Según diz esi Caamaño, que polo visto ye ministru de Xusticia de Zapatero, quieren que los sos fíos falen la llingua de los so güelos. Y dizlo con cara de bonu, como’l que nunca rompió un platu. Pues que sepa l’amigu ministru, qu’eso mesmo ye lo que llevamos los asturianos pidiendo dende va munchu tiempu, y los que lo torguen lleven les sos mesmes sigles. Que los convenza a ellos.

INSULTOS EN «LA CATEDRAL»

Esti domingu’l Sporting xugó (y ganó) en San Mamés, llamáu polos «grandonos» «La Catedral». Al principiu y más tarde sintiéronse pola Tele los insultos empobinaos al nuestru equipu: «Españoles… hijos de puta». Quiero creyer que fueron una minoría, anque les voces que dieron oyéronse bien. Pero a esa minoría de «gudaris» quiero recorda-yos que, ta mui bien que nun quieran ser españoles, pero que lo que nun val ye que llueu vaigan lloramicando al Parlamentu Español a «blindar» una llei que protexe los sos privilexos económicos. Nin que mientres dicen querer que l’exercitu español marche del País Vascu, llueu pidan al Gobiernu Español que ponga al exércitu a protexer a los sos barcos. Yá ta bien de xugar con dos baraxes.

A DIVERTISE… ¡AR!

Too principió pola privatización de los espacios públicos. Quitáronse les canches deportives de los parques, el que quiera xugar que pague. Tán quitándose los apacarmientos gratuitos de les cais, primero cola Zona Azul (perres pa les Koplowitz) y agora cola construición d’aparcamientos soterraños y la prohibición de facelo en superficie. Pero como-yos paez poca intromisión, quieren regulanos hasta les diversiones. L’Antroxu, que’l sentíu que tien ye’l de reíse del poder (cures, políticos, militares…) ya lu «oficializaron», con desfiles, pregones y toes eses coses. Y lo mesmo tán faciendo coles fiestes más populares. Agora inventen esa «horterada» de «Gijón de Sidras», onde nos dicen a qué chigres tenemos que dir, que díes y a qué hora. Y lo que tenemos que xintar. Emprimando porque el nome suena dafechamente «foriatu». Equí nunca nun  se dixo «ir de sidras», copiando lo de «ir de vinos» que sí tien aquello. Equí siempre sentí a los nuestros mayores, y llueu a les nuestres pandilles «dir a tomar unes de sidra» o meyor, «dir a tomar unos culinos». Y, amás, fadrémoslo cuando queramos y onde queramos. Yá ta bien de dar órdenes.