CHINOS A LA CAI.- Dixeron que s’emplegaron años en facer les investigaciones y que, a la fin, pudieron desenmazcaralos y desfacer una de les mafies chines más importantes qu’operaben n’Europa. Y agora resulta que pónenlos na cai porque un xuez túvolos reteníos más del plazu llegal de les 72 hores. ¿Pero esto qué ye, una coña? ¿Somos de verdá un país de mierda o ye qu’hai dalgo más, debaxo de too esto? Porque la cosa fiede fatal. Quiero creyer que se tirará de la manta y que se dirá hasta lo más fondo del asuntu y de les sos implicaciones. Y qu’haya otra forma de volver a meter na «trena» a toos esos criminales que, a lo que paez, deben andar perehí coñándose de nosotros. ¿O ye que fue dalgo peor?
¿QUIÉN GANÓ COLA TREGUA?.- En principiu ganó la población civil porque, de momentu, apararon les muertes.
En cuanto al aspeutu políticu da la impresión de que salió meyor parada Hamas que los xudíos, reforzando’l so lliderazgu en Palestina. Claro que, como yá dixi dalguna otra vez, los xudíos son mui llistos y prefieren tener en frente a los qu’empleguen la fuerza de les armes, que a los qu’empleguen la de la razón. Poro, interésa-yos más tener a un interllocutor como Hamas, anque suponga l’emplegu de la violencia, onde ellos se bancien perbién, que a un adversariu que-yos plantegue reivindicaciones polítiques, como la entrada nes Naciones Xuníes o n’otros organismos internacionales. Esto mesmo dixi cuando soltaron a una «carrapotada» de presos de Hamas, a cambiu d’un soldáu israelí. La impresión que me da a mí, ye que «solo» paez que pierden ante Hamas, pero que, na realidá ye l’oxetivu que quieren. Que pierda Mahmud Abbas que, a la llarga, pue ser un rival más peligrosu.
ESA EUROPA, PA ELLOS.- Ca día tengo más nidio que soi un «euroescépticu», si nun fuere un nome que me carga. Les lluches de paises individuales, unos escontra otros, a ver quien saca más tayada anque seya a base de fundir a otros, ye tolo contrario a 
esa Europa solidaria, democrática y racional con que munchos de nosotros suañamos. Vamos camín, sinón llegamos yá, a esa otra Europa de les vieyes utres, del enfrentamientu por motivos mezquinos col vecín, namás qu’agora nun s’empleguen les armes, sinón otres más sofisticaes que se llamen «presupuestos», «Bancu Central Européu», «recortes de fondos estructurales», y coses asina. Pa más aquello, acaben de nomar comisariu (al cambiu como si fuere ministru) a un sinvergüenza llamáu Borg, como’l tenista, que ye homófobu, antialbortista, antidivorcista y nun sé cuentes coses más. Cargos que tarán mui bien pa presidir la Ilesia de Malta a la que perteneza, pero que son impresentables pa dirixir l’aria de Salú de la Xunión Europea. Eso sí, fue cola votación favorable de la mayoría del Parllamentu européu, encabezada pol Partíu Popular européu. Lo dicho: que me vaigan borrando.
XUSTICIA PA RICOS.- L’aumentu estratosféricu de les tases xudiciales va a producir, seguro, un descensu del
trabayu acumuláu nos xulgaos y asina los xueces y demás personal adscritu, tendrán tiempu pa ponese al día. Pero ello ye a costa de que los ciudadanos tengamos que renunciar, por nun tener perres pa ello, a defender los nuestros drechos ante la Llei, lo cual, dicho d’otru mou, va a representar tener que «tragar» coles arbitrariedaes d’empreses, instituciones o la propia Administración que van poder abusar de nós como y cuando quieran. Ye otra xenialidá del ca día más «facha» Gallardón, que bien nos engañó cuando andaba perehí en puestos menores. Agora que llegó onde quería, amuesa la so verdadera cara. Una cara, por cierto, bastante dura.
