TORTURA N’ESPAÑA.- L’indultu del gobiernu d’España, firmáu pol «facha» Gallardón, a un grupu de Mossos d’Esquadra torturadores, asoleya un doble motivu d’esmolición: Primero, que nuna sociedá que se supón democrática esistan gravísimos atentaos escontra los Drechos Humanos, como ye la tortura. Cosa que yá bien denunciando Amnistía Internacional dende va tiempu. Segundo: que en llugar d’esaniciar dafechu esos abusos y eses práutiques, el gobiernu dea a los torturadores dos indultos (un primeru parcial, y otru segundu total) ye entovía más grave y pon de relieve qu’esti gobiernu y esti país nun entraron, daveres, pel camín de la democracia, pese a toles declaraciones fachendoses que se suelen facer. ¡Qué vergoña!
UNES REAICIONES IMPROPIES Y PELLIGROSES.- Les reaiciones d’ EE.XX ya Israel al sofitu internacional al pueblu
palestín pa dir creando’l so propiu Estáu, podríen paecenos la típica «pataleta» d’un guah.e enfadáu sinón tuvieren unes consecuencies tan esmolecedores. EE.XX zarrando nel so país la oficina diplomática de los palestinos, y los segundos apropiándose de les perres de los impuestos palestinos, y anunciando otra ocupación del so territoriu (el palestín) con tres mil nuevos colonos. L’otru día comentaba yo nesti mesmu llugar cómo los xudíos prefieren entendese (a tiros) con Hamas, qu’enfrentase civilizadamente nos foros internacionales con Mahmud Abbás, Presidente de l’Autoridá Nacional Palestina, y ello porque saben que nun tienen razón y que lleven les de perder. El casu ye que, d’esi mou, tampoco nun llogren más que quedar aisllaos del restu del mundu y, eso sí, semar la muerte y la destruición al so alredor. ¡Qué pena, d’un pueblu al que toos compadecimos tres tantes muertes a manos de los nazis!
¡PROBES XUBILAOS!.- Otra vuelta, los coleutivos más débiles van ser los que sufran les mas grandes consecuencies de la crisis que promovió’l capitalismu financieru y los sos organismos «represores». Los xubilaos (pallabra sagrada pa tolos gobiernos, ésti incluyíu) van ver amenguada la so paga, nun sólo por tolos aumentos de los impuestos indireutos que paguen na mesma cantidá que los millonarios, sinón porque la promesa de que nun diben a disminuir los sos ingresos vese incumplida dafechu. Y yo digo qu’ un gobiernu que ye capaz d’incumplir toles sos promeses, y de nun abellugar a los más débiles de la sociedá, pierde’l respetu del pueblu que lu nomó y que, poro, debería dimitir. Yá sé qu’eso ye una utopía, pero quiero creyer que, polo menos, la xente tien de tener memoria y nes prósimes eleiciones da-y un votu de castigu. Porque, amás, nun ye solo nel casu los xubilaos, sinón en tolos coleutivos más necesitaos d’axuda y amparu. D’ehí la manifestación de los minusválidos (agora llamaos «dependientes») del otru día en Madrid. Lo de siempre d’esti capitalismu «rampante»: tolos privilexos pa los ricos (véase l’amnistía fiscal que, por cierto, fue un fracasu), y tolos «palos» pa los probes y los débiles. Robin Hood al revés.
UN «CARADURA» PA LA CÁRCEL.- Mentanto ocupó la presidencia de los empresarios nun aparaba de reñinos y de
danos lleiciones. «Hai que trabayar más y cobrar menos», dicía’l sinvergoña d’él. Agora, lo que principió siendo una sospecha, ye yá una realidá dafechu: ta deteníu por tramposu, defraudador y nun se cuantes coses más. La entruga demagóxica del momentu podría ser: si esi «elementu» yera’l cabezaleru de los empresarios, como sedrán el restu d’ellos», pero como digo eso sedría dalgo demagóxico, porque sé, y conozo, qu’hai empresarios honraos y que, amás, creen empléu, como hai trabayadores «caradures» que fain trampes a la Seguridá Social y a Facienda. Pero eso nun quita pa que cuando esi coleutivo d’empresarios dea opiniones sobre’l mundu llaboral, les sos rellaciones, y les posibles soluciones a la crisis, nun tengan un poco más de midida y autocrítica. Nun vaigan a pasar coses como éstes.
