NUNCA MÁS.- L’espectáculu aéreu que testeronamente nos apurren tolos branos a Xixón ye dalgo que nun tendría que se repitir. Ye pelligrosu, y yá hai antecedentes notros llugares del mundu d’accidentes mortales. Una cosa ye qu’un avión, nel so cometíu normal de viaxes, tenga un accidente y muerran docenes de persones, y otra andar xugando con fueu. Ye caru, porque movilizar combustible pa toos esos aparatos nun ye mover un «seiscientos» pel Muro. Nun hai perres pa otres coses importantes (educación, sanidá…) y tírenles neses babayaes. Ye ruidosu, al puntu que molesta a la mayor parte la xente. Tando con un neñu pequeñu que mamaba de so ma, el probín quedó ablucáu y empezó a ponese verde, como ensin aire hasta que reaicionó. Nun digamos ya los enfermos, los perros, que nun saben onde se meter, etc. Y ye absurdu, porque nun sé si quieren xugar a los «soldadinos» o facer demostraciones militaristes, pero nin lo uno nin l’otro m’interesa. En resume: Polo que a min respeuta, como’l Prestige: «Nunca más».
REPROBACIÓN.- El «María Moliner» define la pallabra Reprobar como: «Censurar o desaprobar una cosa enérgicamente, por razones morales«. Na menos que’l Parllamentu Asturianu acaba de «reprobar» al ex-presidente del gobiernu Vicente Álvarez Areces, xunto con tres de los sos conseyeros y otros altos cargos del so gobiernu, pola so actuación nel llamáu casu «Marea». Nun ye una cosa menor. Si yo fuere políticu y me reprobare la másima institución política del mio país, meteríame nun furacu y fadría por esapaecer del mundu de la política, como si d’una maldición se tratare. Pero paez qu’al «ex-presi» eso lu trai «al pairo». Ehí sigui nesi cargu de «ciencia-ficción» que ye ser senador, ensin ponese coloráu. ¿Nun hai eso que se llama «vergoña torera»?
ARCU ATLÁNTICU.- Pese a que’l mio estáu d’ánimu nun ye’l meyor del mundu, di una revolada pelos llugares del Arcu Atlánticu, atarraquitaos d’un públicu mui participativu. El Campu Valdés, colos sos puestinos empobinaos a Portugal, la Plaza Mayor con un interesante grupu de percusión, y tol paséu del Muelle colos puestos lliterarios y la carpa de les conferencies y presentaciones. Tuvi, amás, la suerte de sentir falar a Dani García de la Cuesta sobre la gaita lo que me prestó abondo, y eso que muncha xente nun yera asturiana, y depués a Berto Álvarez Peña presentando un llibru sobre mitoloxía asturiana en francés. Como siempre, un Illustráu. Y sobremanera too mui «nuestro» y mui lloñe de la cutrez d’otres manifestaciones asemeyaes. ¿Entiéndese, non?
MERCEDINES LA NUESTRA.- La eterna perdedora política, Mercedes Fernández, salió l’otru día na prensa defendiendo
la honorabilidá propia y del so partíu al respeutu del tema Bárcenas. El titular del periódicu (El Comercio) ponía «La contabilidad del PP es clara» afirma Mercedes Fernandez ante las insinuaciones de Bárcenas. Siento correxir al periódicu xixonés: lo de Bárcenas nun son «insinuaciones», nin como dicen otros políticos «chantaxes», son unes acusaciones concretes feches ante un xuez. Nun ye lo mesmo dicir les coses a los periodistes, que declarar delantre un xuez con peligru de cayer en perxuriu. La cosa yá pasó d’esi primer nivel de bilordiu, pa camudase en dalgo muncho más serio. Asina que les declaraciones echando balones fuera, que les dexen pal xulgáu. Ellí se verán les cares.
