MINA.- Hai ultimamente un ciertu desprestixu de la clas minera, d’esos trabayadores que, a munchos metros baxo tierra, arrinquen el carbón de les galeríes nunes condiciones durísimes. Cuando les caberes güelgues mineres, munchos de corbata y traxe dixeron que yeren unos privilexaos y recatafilaben dalgunos d’esos supuestos privilexos. Bien, que se pongan ellos. Como-y dicía’l chinín aquel que diba a morrer al cura que lu alendaba a colar pal cielu, porque aquello yera bonísimo: “¿Quier usté cambial?” Agora, cuando se produz un socesu de les carauterístiques del de Pola Gordón, paez que los privilexos nun son tantos. Nun sé cuál fue la causa d’un accidente tan vieyu como la propia mina, el grisú, pero quiero creyer qu’esti progresivu y aceleráu procesu de zarrar les mines nun tea produciendo fallos nos sistemes de seguridá. Porque estos tienen que tar activaos a tope, seya igual pa miles que pa unos pocos. Les vides humanes nun se contabilicen al pesu, como los garbanzos.
CANTABRÉS.- Nun sé si se llama asina a la llingua tradicional de los cántabros, una llingua que yo creyía escaecía cuantayá, o ye, cenciellamente, una variante más oriental del asturianu. El casu ye que, agora que llevo un tiempu alternando la mio residencia ente Xixón y Santander, toi viendo cartelos na Universidá de Cantabría escritos nesa llingua. Fírmalos un coleutivu llamáu “Regüelta” y, por poner un exemplu, un d’ellos encabezábalu asina: “24 d’utubri güelga ena aducación. ¡No a la Lomce! Aducación públicu, críticu y cántabru. Del pueblu y pal pueblu.” La verdá ye que me prestó lleelo, yera cuasi como tar en casa.
OTRA COSA.- Hai en Xixón una xuntanza de chigres que, al mou de Gascona, pretenden facer una especie de ruta de la sidra. P’animar “el cotarru”, entamaron un concursu de Cancios de Chigre. Esa actividá tan asturiana de cantar nos chigres que, cuando yo yera mozu, practiqué abondo colos amigos de la pandilla. Llueu vieno la Tele, el fútbol y los lletreros de “Prohibido cantar” y acabóse too. Agora quieren retomar l’actividá pa da-yos dalgo más de vida a les sidreríes. Pero cuál nun sedría la mio sorpresa cuando m’entero que ganó un grupu que se llama “Del coro al caño”, cantando canciones… n’inglés de los años 60. Con tolos mios respetos a organizadores y ganadores: eso nun tien res que ver con nós, nin coles nuestres tradiciones. Que lo llamen d’otru mou.
ESPIONAXE ESPERPÉNTICU.- Si nun fuere tan grave sedría pa reíse. Too eso del espionaxe de los americanos a los sos socios, paez sacao d’un monólogu de Gila: “¿Oiga, es el enemigo…? Que se ponga.” Pente medies de too ello entérome d’una cosa qu’axuda al “surrealismu” del asuntu. O entendilo yo mal, o l’embaxador de los EE.XX n’España nun sabe falar español (!). Y llueu, el nuestru gobiernín (el “rajoyanu”, non el “javieranu”) faciendo’l “papelón” de que tán mui indignaos, cuando nin siquier quixeron apautase con Francia y Alemania pa esixir unes series desplicaciones, nun vaiga a ser que nos tomen en serio… Pero eso sí, la culpa, como siempre, ye del mensaxeru. Esi «probe» Snowden, antiguu miembru de la Cia, que fue’l que se chivó. Como dicía l’otru día una Olivina d’esi conocíu y xenial autor xixonés: toi pensando faceme insumisu de la política. Pues eso.
