¿QUÉ FIZO’L PADRE CHUS?.- Torna a la palestra’l casu del famosu padre Chus, párrocu de Castiello de la Marina, separtáu de la collación, de les sos clases de Relixón nel IES Xovellanos y suspendíu a divinis pol ínclitu obispu d’Uviéu señor Sanz Montes (¡qué mala suerte tamos teniendo colos obispos!), cargos toos ellos mui graves como pa que los sos parroquianos, alumnos y pueblu cristianu en xeneral nun tengan una detallada desplicación. Nun val acoyese a un supuestu «secretu canónicu» pa nun dicir de qué se lu acusa, o tirar una piedra (escondiendo la mano) embaxo a unes supuestes «denuncies de fieles», sobre una supuesta «conducta inapropiada». A la escontra, y poles sos propies declaraciones, tanto los feligreses de la collación como los sos alumnos y ex-alumnos falen estupendamente del padre Chus, y nun se pue manchar el bon nome d’una persona, seya o non sacerdote, con vagues acusaciones de les que nun pue defendese por ignorales. Igual ye qu’a les autoridaes relixoses asturianes -lléase Sanz Montes- nun-yos prestaba muncho que’l padre Chus tuviere una comunidá con xente marxinal. Pero eso sería como echar a Xesucristo por defender a la prostituta a la que queríen matar a pedraes. ¿De parte de quién ta l’obispu?
OTRU MISTERIU.- La «opacidá», por nun llamala d’otru mou, llegó tamién al Gobiernín Asturianu. A estes altures de la película entovía nun se fizo públicu l’informe de la Oficina Europea de Llucha contra’l Fraude onde s’esmenucen les irregularidaes de les obres d’ampliación del Muselón: per un llau’l sobrecostu y per otru la xestión. Nun sé si’l Partíu Popular lu conoz, pero’l restu los partíos y la xente «de a pie» o seya, tu y yo, andamos a grillos. Igual va a ser lo que diz esi Fernando Lastra, portavoz del PSOE, qu’afirmaba públicamente que «es un documento muy complejo en su análisis y en su interpretación». Lo de siempre, el pueblu ye menor d’edá y, entós, hai qu’interpreta-y les coses pa que les entienda. ¿Por qué nun prueba a asoleyar el documentu, a lo meyor axudámoslu nosotros a «interpretalu»? El que paez que yá lu tien interpretáu ye Tini Areces qu’anda diciendo perehí que nun hai nenguna irregularidá. Y ye qu’esos d’Antifraude que tán ehí en Bruseles lo único que quieren ye tocanos les narices con babayaes. ¡Que se vaigan a freir frixuelos, ho!
LOS PREMIOS MARÍA TERESA GONZÁLEZ.- L’otru día fui d’invitáu al Atenéu Obreru de La Calzada a les XIX Xornaes de Llingua y Cultura Asturiana. Como tolos años, aconceyámonos pa entregar los premios que lleven el nome de Tere, que taría mui contenta de ver que’l futuru de la llingua pola qu’ella trabayó, tien continuidá. Invitáronme a dicir unes pallabrines y procuré nun ser un «peñazu», porque lo importante yera achisbar les cares de contentu que teníen los neños al lleer los sos trabayos y recoyer el premiu. Por cierto, el 99 % de los premiaos yeren neñes. Nun sé si ye que participen más o, cenciellamente, que son más llistes. L’añu que vien cúmplese’l XX aniversariu. Habrá que facer dalgo pa festexalo ¿non?
SANDOVAL POL DESPEÑADERU.- De xuro que non tola culpa ye
d’él, pero como másimu responsable del equipu la mayor parte yera suya. Vi xugar esti añu al Sporting les veces suficientes pa concluyir que fue un desastre: ensin orde, tensión, sistema… xugando al patadón, mal asitiáu nel campu, una defensa floxa, ensin estremos salvo l’esforzáu y merecedor de meyor suerte Canella. Sandoval fue un vendedor de fumu que tapecía la so inutilidá embaxo grandes pallabres y «guiños» a la mareona: el sentimientu, los colores y demás topicazos del que nun fala nel campu, sinón nel vestuariu. Bien marcháu ta. Agora, en media docena partíos, «el pitu» Abelardo debería poner un poco sentíu común nel campu ya imponer un sistema de xuegu. El que seya, pero que los xugadores sepan a qué atenese. Tien una ventaxa: peor nun se pue facer. Suerte.
