PÓNEN-YLO A GÜEVU.- Otra cacicada de los partíos españolistes mayoritarios, PSOE y PP: pauten, pa mangoniar la televisión asturiana, una llei onde, según dellos grupos asturianistes, «va a dexar fuera l’usu del asturianu». Cosa que, digo yo, ye amás illóxica puesto que los programes qu’empleguen la nuestra llingua son los más vistos de la programación de la TPA. El pautu va a encartia-yos tamién pa controlar un mediu de comunicación importantísimu cara a les prósimes eleiciones. Con toes estes «trapisondes» y esta forma de gobernar, tán poniéndo-ylo a güevu al grupu que representa «Podemos», fartu de denunciar les politiqueríes d’estos vieyos partíos tramposos que nun cumplen nin colo qu’ellos mesmos aprobaron nel Estatutu Asturianu y la Llei d’Usu, que yo sepa en vigor entovía. Llueu cuando pierdan les «canonxíes», vendrán llorando como un Boabdil cualquiera.
CON UN PAR.- Igual nun ye mui protocolario dicilo asina, pero’l Papa Francisco ta enfrentando los problemes de la so Ilesia «con
un par». Asina hai que lo interpretar cuando recibe a unos representantes de los que sofrieron abusos sexuales por parte sacerdotes y Obispos, pa pidi-yos perdón y prometer el castigu correspondiente a los agresores. Y tamién pa intentar poner orde nesi cáncanu que ye’l Bancu Vaticanu, ñeru de corrupteles y de dalgo más gordo entovía. Diz que va a escomulgalos, pero eso a min nun m’abasta, tamién tien que mandalos a la cárcel. La escomunión queda pa la otra vida.
LOS REIS Y ASTURIES.- El tratar de que los Reis d’España tengan un detalle con Asturies ye como lo de lava-y la cabeza a un burru: gastar tiempu y champu. Si non lu tuvieron siendo Felipín Príncipe d’Asturies, van tenelu agora que ya son de tolos españoles… O seya qu’eso de busca-yos una residencia pa que vengan a pasar dellos díes de vacaciones ye perder el tiempu. Siguirán viniendo un día, agora cola so fía, la nueva «principesa», a dase un bañu d’asturianía en «Arrancatapinos d’arriba», meyor pueblu asturianu. De l’otro, lo serio, lo que podría dexar perres y prestixu nel nuestru País, nada. Voi propone-yos que, polo menos, matriculen a la Principesa d’Asturies nun cursu de gaita por correspondencia. Eso pue facelo dende casa.
NUN TIEN IGUA.- La guerra de Xudíos y Palestinos ta claro que nun tien igua. Y cuando paez que pue tenela, como nesti casu
depués d’aconceyase dambes partes col Papa, siempre pasa dalgo que lo tira per tierra. ¿Será casualidá o habrá una mano negra enfotada en que la cosa nun se llogre? Hai munchos servicios secretos pagaos por dalgunos poderosos pa que les coses sigan como tán. Y los que podíen aparalo, como los Estaos Xuníos, tán en manes de los Lobbies y los banqueros yá sabemos de qué signu. En fin, probe pueblu palestín. Claro qu’ellos nun son los «elexíos» pol Señor.
