QUE NUN TOQUEN EL NOME.- Vienen agora estos sportinguistes de nuevu cuñu y piensen que, porque ocupen altos cargos nel equipu, tienen drechu a cambiar el nome tradicional del nuestru campu de fútbol: El Molinón. El presidente del Sporting nun ta ehí elexíu por naide, nin por ser el más sportinguista de toos, sinón solamente porque ye’l que tien más perres. Igual podía ser un d’esos árabes y querer que se punxere al campu el nome de “La Meca”. Hai coses coles que nun se pue xugar, los nomes tradicionales ye una d’elles. El Molinón ye nestos momentos el campu de fútbol más antiguu d’España y un de los pocos que caltién el nome orixinal. Eso ye más importante que toles perres que puedan da-yos a esos mercantilistes de a perrona que, amás, usurpen les funciones que namás correspuenden al verdaderu propietariu del estadiu: l’Ayuntamientu de Xixón. Nin acompañáu nin solu: El Molinón nun se cambia.
ACABAR COL RUIU.- Ya lo defendí munches veces: tol mundu tien drechu a divertise, faltaría más, pero nunca nun pue ser a costa de facenos tragar a tolos demás un millardu de decibelios que nos dexen alloriaos, insomnes y atacaos de los nervios. La cosa ye más gorda y tien más repercusión cuando asocede nel centru del pueblu, como’l casu del Solarón. Pero los que tenemos una casina rural –la nuestra nel Altu Deva- tenemos d’aguantar les orquestes, al altu la lleva, de Quintueles, Quintes, Cabueñes, Deva, Pión, Granderroble, etc, etc. que, a veces hasta les seis de la mañana (Pión), nun te dexen dormir col tachunta-tachunta. ¿Qué ye qu’un pocoñín más baxo nun presta igual pa escuchalo o pa baillar?
MIERDA AL AGUA.- Paez que fue una falsa alarma, pero ta claro que coles
perspeutives actuales y tal y como tán les coses cualquier día les manchones de la mar van ser de mierda. Ye inconcebible qu’una ciudá de 250.000 habitantes nun tenga solucionáu’l problema de la depuración de les agües residuales. Porque eso del “emisariu submarín” nun ye más que tirar la basa un poco más lloñe. Lo curioso del casu ye sentir protestar a los socialistes del Ayuntamientu de Xixón que gastaron una estrapayada de perres nuna depuradora que resultó ser illegal. Pero eso sí, el gobiernu socialista del Principáu lo primero que dixo al ver la mancha fue: “¡Ai, eso nun ye competencia nuestra!” ¿Y lo d’Asturies Paraísu Natural? ¿O Xixón nun ta dientro d’Asturies? Habrá que trabayar toos xuntos pa ver de solucionar un tema tan gordu ¿non? Y non dexar que caún se les arregle como puea. Amás ¿quién respuende de tolos millones tiraos a la povisa y de tola la mierda que se ta tirando al agua, el maestru armeru?
