close
Olivando

Olivando

1.- AMAGÜESTU: Suena un poco a amagüestu y un muncho a cacicada centralista, el rechazu a la especialidá d’Inxenieru d’Organización Industrial que taba solicitada pal Campus de Xixón. Llueve sobre moyao. Muncho hubo que lluchar dende la capital de la Costa Verde, la ciudá más poblada d’Asturies, pa poder llevar alantre esti cachín d’Universidá del que gociamos anguaño. Nun vamos recordar agora -facíalo l’otru día El Comercio- les posiciones cerriles del exrector de la universidá uvieína, l’ínclitu Teodoro López-Cuesta, torgando’l desarrollu del Campus xixonés, polo que fue nomáu pol ayuntamientu plenu “persona non grata”, nin otres xugaes “rocambolesques” como les ides y venides del tamién ínclitu Gustavo Bueno y la so “división panzer” de Filosofía. Son histories vieyes anque sabemos que tán ehí. Pero a esti altor de la película refugar esta interesante especialidá pa la Universidá d’Uviéu (güeyu: nun sólo pa Xixón) con argumentos de perrona, fala mui mal de los representantes del Principáu. Yá lo ficieron fuera’l bacín creando esi monstruu que ye’l Campus de Mieres, un páramu nel que se sapozaron una montonera perres, pa qu’agora vuelvan a meter la pata con esti rechazu a una Inxeniería que seguro qu’afitaría n’Asturies parte d’esa mocedá que nun alcuentra más solución que tirar Payares p’alantre. Tán a tiempu rectificar.

2.- CONTAMINACIÓN.- Anden estos díes en Xixón tolos aparatos que miden la contaminación sobrecargaos. A dalgunos debieron fundíse-yos los plomos, porque esta ciudá con vistes a la mar ta dando los másimos rexistros negativos. Recueye la páxina www.ecoticias.com que se disparó na menos qu’un 560%. siendo una de les ciudaes más contaminaes d’Europa. Nun ye una broma. Pa cualquier ciudá, pal so ayuntamientu, pa los grupos políticos y sociales, la mayor prioridá tien de ser la calidá de vida de los sos habitantes. Y cuando digo “calidá de vida” ye nel sentíu lliteral. O seya, la calidá de la salud, del bienestar físicu. Paez ser qu’hai un aumentu esponencial de casos con problemes respiratorios y d’otru tipu rellacionaos cola contaminación. Nun pue ser, Pa qu’encima venga esi pelamangos de la conceyalía de turismu y otres prebendes a dicir que sí, que bueno, pero que ye una cosa de puertes pa dientro y nun repercute nel turismu. ¡Home, que nun fadie! Creo que Chernobil ta enlleno turistes. En fn, que ta mui bien too eso del Plan de Víes, pero lo que tien de ser prioritario ye un “Plan de Vides”. Fuera d’eso, lo demás ye secundario.

UNA CAMPAÑA DE VERGOÑA.- Entiendo que ye mal momentu pa reivindicar cualquier seña d’identidá propia. L’odiu a lo catalán y, por estensión, a tolo que güela a señes identitaries propies, cabalga desbocadamente como los cuatro xinetes del apocalipsis per cuasi tol territoriu d’eso que los cursis llamen “la piel de toro”. Al puntu que yo, que m’importa un pimientu la independencia de Cataluña, tuvi que dexar d’entrar en dalgunos bares “hooligans” que dexaron de vender el cava catalán y hasta la cerveza Voll-Damm. Siéntolo por ellos, pero conmigo nun van facer demagoxa. A lo que diba: son malos tiempos pa lo identitario. Pero d’ehí a esa canellesca campaña que dellos grupos y persones entamaron escontra la llingua asturiana, mintiendo, desaxerando y amosando una intolerancia digna de meyores causes, debería haber un abismu. Una campaña principiada pola eterna perdedora Cherines Fernández y los sos fieles del PP asturianu, siguida por una refugaya de partíu llamáu “Vox”, facha onde los haya, y les sos “hijueles” en forma de plataformes a la escontra y de grupos del día bisiestu. Y alendada por dalgunos, vamos llamar “profesionales”, que dende l’audiencia que-yos da un periódicu de ranciu españolismu, nun dexen d’atacar, nun sólo la oficialidá, sinón a la propia llingua y a los que la falamos. Campaña qu’agora treslladaron a otros medios estatales, como l’ABC -con un artículu ignominiosu firmáu por un tal Roberto Pérez (¿será’l que tuvo en Mallorca?)- onde dispara a tolo que se mueve, o na propia cadena Antena 3 que tamién se fizo ecu del tema.  Y ye que ¡yá ta bien! Espero y deseo qu’aína tengamos oficialidá na nuestra tierra y que los que falamos y escribimos n’asturianu nun tengamos menos derechos que los demás, pero si nun ye asina, habrá que recorda-yos a los nuestros fíos y a los nuestros nietos quiénes fueron los que torgaron esos derechos y cola ayuda de quién lo ficieron. Nin perdón, nin olvidu.