FRITANGA Y CUTRERÍO.- Siéntolo, yá sé que tol mundu ta encantáu con eso de la Semana Negra, incluida la intelectualidá nativa y foriata, pero yo sigo viéndolo como lo que siempres fue: un chiringuito del PSOE p’allegrar a los sos amigos. Abaste con mirar la semeya inauguradora col ínclitu Tini Areces cortando la cinta, como nos vieyos tiempos. Y hasta los nuevos como la Moriyona o el de Xixón Sí Puede ponen el careto pa salir en portada. Dos coses me repunen penriba les otres: la caradura de la Conseyera de Cultura, que nun va nin amarrada a nenguna cosa del asturianu, y equí tamién corta la cinta porque, coño, esto si ye cultura y non el Día de les Lletres Asturianes. Y otra, nun ye de recibu que la folixa negra dure diez díes hasta les cuatro de la madrugada. ¿En qué país del mundu diba a consentise esi horariu? ¿Pero ónde tamos, en que la xente que vive na rodiada (siéntese’l “tachum” hasta nel altu Deva) nun puede dormir hasta les cuatro de la mañana una porrada de díes?
NOSOTROS ZARRAMOS LOS CINES.- Toles plañideres xúntense na prensa pa llorar pola muerte de los últimos cines del centru la ciudá. Llárimes de cocodrilu. Si tolos que lloren y escriben coses cursis al rodiu d’esa muerte cantada yá dende hai abondu tiempu, fueren un solu día a la selmana a pasar por taquilla, los Cines Centro nun tuvieren zarrao. Pero queda mui bien la llarimina cuando yá nun hai remediu. ¿El cine yera caru? Que nun fadien. La xente paga diez veces más por dir a ver un callu de partíu de fútbol, o por tomar una cerveza y un pinchu en cualquier tuguriu. Lo que pasa ye que produz mala conciencia ver cómo aquel espectáculu cívicu y coleutivu, qu’allumó la nuestra infancia, se va’l garete por nun echar la mano al bolsu. Somos mui rumbosos coles perres d’otros.
OTRU ÍDOLU CAYÍU.- La sinvergonzada que-y fizo la siempre bien retratada (pol “Marca”) afición del Real Madrid
al grandísimu porteru que ye Casillas, nun tien nome, anque los malos de la película son munchos más. El primeru aquel innomable entrenador portugués que lu enfrentó cola xente, y llueu esi presidente que ta nel fútbol polos sos propios intereses. Y los que vieron y callaron, que son munchos na direutiva y nel cuerpu téunicu del equipu. ¿Qué ye, qu’un de los meyores porteros na historia del fútbol español nun tien derechu a retirase nel equipu de la so vida? ¿Pa que tenga que dir a morrer a esi cementeriu elefantes que queda n’Oporto? Y agora vienen entonando requiems y gloses a la so figura. Vergoña-yos tenía que dar. Zarrar la so vida deportiva solu, nuna rueda de prensa na que terminó llorando… Al que teníen qu’echar yera a esi Florentino que nin sabe de fútbol, nin ye eso de lo que presume: un caballeru. Más bien ye un palafreneru, por nun llamalu coses peores.
