¿Y A QUIÉN VOTAMOS, GALLU?.- Eso yera lo que ponía va tiempu una pintada nuna muria del barriu La Arena. Y la fras ta d’actualidá. Nun sólo porque los que quieren representar a Asturies paecen sacaos del «tunel del tiempu» (Mercedes Fernández, Álvarez Cascos, Trevín, Areces, Llamazares, el de la Tía Nemesia, etc.), sinón porque la propia representación política ta quedando n’evidencia. Los políticos, escoyíos pol pueblu soberanu nes urnes, tán dexando pasu a esos llamaos «gobiernos de tecnócrates» escoyíos por Bruseles o, pior aún, por esi ente etéreu nomáu «los mercaos». Etéreu, pero como’l «Verbu», fechu carne ente nosotros. Asina que nun me va a quedar más remediu que facer como un de los personaxes de la mio novela «Alabín, bon, ban», que votaba siempre: «Al Presidente de la República» porque, anque persabía qu’esi votu nun yera válidu, polo menos servía pa salvar la so dignidá.
LOS OCALITOS «ASESINOS».- Una propuesta del PP, col sofitu del PSOE, fizo que s’aprobare nel Parllamentín Asturianu la plantación d’una especie d’ocalitu, la llamada
nitens, que ye práuticamente como Robocob, nun hai quien pueda con ella. Si ya los anteriores ocalitos, los que pueblen una parte perimportante del nuestru país, yeren abondo perxudiciales, estos nuevos «asesinos» del bosque autóctonu van dar la puntilla a lo qu’entovía quedaba d’el. Ye curioso, por dicilo d’un mou sele, que los dos grandes enemigos políticos que s’espedacen n’otros munchos temes, namás s’apauten pa fastidianos a nosotros. Lo mesmo asocede col estatutu y el tema la llingua. ¡A ver cuando se xunen pa dalgo de provechu, ho!
AXUDA PA LOS HORROS.- Por fin, depués de munchos años, paez que les coses dan la vuelta y, en llugar de valtalos, van entamar una política de sofitu pa los horros. Nesti mesmu blogue, tengo criticao con puxu’l derribu y la desatención 
d’esi patrimoniu material de la nuestra tierra: los horros y les paneres. La última cuando l’asuntu aquel de la ZALIA que se desfizo d’unos cuantos «monumentos vivos» de la nuestra cultura. Yá tenía gana de poder dicir dalgo positivo del Conseyeru Emilio Marcos Vallaure y del direutor de Patrimoniu Juaco López. Que sigan per esi camín.
LLIBROS FORIATOS PA LES NUESTRES BIBLIOTEQUES.- El titular del periódicu ponía que les Biblioteques de Llangréu aumentaben los sos fondos cola compra de «novedaes editoriales». Al paecer unos 50 exemplares, lo cual dixebrao ente toles biblioteques del conceyu nun resulta una cantidá mui grande. En cualquier casu, y polos
títulos que citaben, nun hai llibros asturianos. Non yá escritos n’asturianu, sinón nin siquier d’editoriales asturianes. Esta ye la política cultural al rodiu del llibru: primero lo de fuera, y depués lo foriato. Pese a lo ridículo de la inversión (unos 800 euros), non por ello dexa de ser un insultu a los que nos dedicamos a escribir nesti país, y a los que, con munchu esfuerzu, se dediquen a esi llabor editorial qu’en cualquier otru llugar taría abellugáu y promocionáu. Lo mesmo ocurre colos ayuntamientos y otres instituciones asturianes, que merquen llibros de regalu pa Navidá a…. editorial Everest o otres editoriales foriates, cuando les asturianes tienen agora unos llibros guapísimos qu’habría que promocionar. Vamos tener qu’inventar un eslogan que diga dalgo asina como: «Ponga un llibru asturianu na so casa». Porque, a esti pasu, vamos terminar como colos ocalitos.
