1) HITLER TA PA PONGA
L’afayu d’un balagar de semeyes de los nazis n’España, llocalizaes nun pueblu de Ponga, pon de manifiestu’l verdaderu rostru de los dirixentes franquistes y la so rellación cola Alemania de Hitler. Namás cola perda de la guerra por parte d’ésta, anicióse un sele desapegu qu’evitare l’aisllamientu, anque cantidá de símbolos nazis pervivieron hasta munchu tiempu depués. Un documentu qu’aguardamos poder ver bien ceo.
2) UN SILENCIU CULPABLE
El silenciu de la xerarquía católica ante la muerte na India del cooperante Vicente Ferrer, asoleya tamién el verdaderu rostru de la Ilesia-Institución frente a esa otra «Ilesia de los probes» que representaba l’ex-xesuíta o los miembros de la Teoría de la Lliberación. ¿Daveres ye la mesma ilesia la de Rouco Varela que la de Ferrer? ¿Si volviere Xesús a la tierra, a cuál de los dos ilesies pertenecería?
3) UN GOBIERNÍN LLANTÁU NA ILLEGALIDÁ
La reaición del Gobiernín asturianu ante la sentencia que declara illegal l’Estatutu de la Función Pública, nun valió pa entonar el «mea culpa» y pedir perdón a los sindicatos qu’asina lo manifestaben. Enantes a la escontra, foi aprovechao pa presentar a estos como los «malos de la película», que quieren quita-yos perres a los trabayaores. Pero la norma númberu ún de cualquier gobiernu tien de ser el respetu de la llegalidá vixente. Tolo demás son «mandangues», y más cuando esi gobiernu pretende arrogase unes funciones llexislatives que nun-y competen. Si un Gobiernu fai les lleis, les executa y les xulga, eso tien un nome mui nidiu: Dictadura.
4) UN SINDICATU QU’APUNTA PAL LLAU ENQUIVOCÁU
Seguramente hai munches maneres de defender a los trabayaores, pero nenguna se pue sofitar en defender una illegalidá, por más qu’eso suponga mayor cantidá de perres. Eso ye lo que diz un tal señor Pino, responsable de Comisiones Obreres, qu’echa la culpa d’eso a los sindicatos que’l llama «minoritarios». Esos sindicatos cumplieron col so deber, que ye denunciar lo que ta mal fecho de raiz, perxudique a quien perxudique. La postura d’esi «responsable» sindical recuérdame a aquellos otros que criticaben que se lluchare contra la droga en Galicia, porque d’ello vivíen munches families. ¡Home, que nun fadien! Casu paecíu ye’l de los que denunciaron el sobrecoste d’El Muselón. Resulta qu’agora los malos nun son los despilfarraores, sinón los que lo denuncien. Cosas veredes, mio Cid.
