Nun soi un «politólogu», nin toi del too al día nos movimientos de los partíos políiticos n’Asturies, poro, la mio opinión nun tien otru valir (nin lo pretende) que la de cualquier ciudadanu d’Asturies enfotáu, eso sí, nes coses d’un país que merecería una voz propia nel Parllamentu. Siguí con interés, y una sele esperanza, los pasos que se dieren pala xuntanza de los distintos partíos nacionalistes/asturianistes, col comencimientu de que la presentación per separao a les eleiciones de Mayu sedría un suicidiu. Nesi sen, dalgo se llogró gracies al esfuerzu de la UNA y el Bloque que, renunciando, de xuro, a masimalismos o visiones personales, fueron a apautase nunos puntos mínimos pa poder presentase xuntos. Pero esto ye poco. Ye nidio qu’a naide se pue obligar a pautar si él nun quier. Allá caún cola so responsabilidá. Pero lo que pa un espeutador interesáu supón el qu’otros grupos asturianistes se presenten per otru llau, ye que vamos tar ante otra ocasión marafundiada. Habrá otres, quien lo dulda. Pero quiciás non coles mesmes carauterístiques qu’amuesa ésta. Toi diciendo, claro ta, que la xunión qu’habría de consiguise agora debiere incluyir, polo menos, al PAS y a la URAS.
Atalanto les dificultaes de la dicha xunión (anque fuere namás ellectoral), pero tolos dirixentes deberíen facer un
analís, llibre de prexuicios, pa valorar si ye meyor caltener la independencia de cada grupu, y quedar (una vuelta más) fuera del Parllamentu, o llograr un alcuerdu de «mínimos» y presentase xuntos, embaxo les sigles que fueren, a les eleiciones. Lo que tamos viendo nestos díes ye que la URAS ta faciéndose, práuticamente, un «harakiri», pues la mayoría de los sos cargos y militantes tán pasándose al Foru «casquianu». Una actitú, ya lo dixi n’otru llugar, d’una indignidá política ablucante, de xente qu’escaez la Historia, o que nun dulda en dir en cata del so porgüeyu personal, al marxe d’ideoloxíes. Pero’l fechu ciertu ye que la URAS ta a piques de desapaecer. Ensin esi sofitu, el PAS deberá presentase, a efeutos práuticos, solu a les urnes, y a esti altor de la película nun da la impresión de que vaigan sacar nengún escañu.
Per otru llau, la xunión Bloque-UNA, tampoco nun paez tener tovía’l recorríu necesariu pa optar al Parllamentu. L’ausencia de Valledor, retiráu del primer planu por motivos desconocíos (desconocíos pa min, claro), depués de postulase durante munchu tiempu como valedor d’un posible grupu nacionalista, quitó fuercia a esi primer emburrión necesariu pa llanzar a un grupu políticu y facelu «visible». Quiciás cara a unes futures eleiciones, si lo trabayen bien, pudieren tener dalguna posibilidá.
Ante esti panorama que yo mesmu me dibuxo, lo cierto ye qu’hai poques esperances d’algamar esi escañu tan necesariu pa dotar d’una voz propia al Parllamentu del nuestru País. Una voz que cada vuelta se fai más necesaria, fartucos yá de sentir a otros dirixir la política escontra los nuestros propios intereses. Una voz que glaye, al alto la lleva, en defensa de lo nuestro, ensin nenguna torga, nin nenguna comeniencia que venga de fuera. Llamentablemente, y oxalá m’enquivocara, vamos tener que siguir esperando.
