Esta vuelta nun falamos de les munches riqueces visibles que tien Asturies, sinón d’otra que nun se ve, pero que ta ehí. El Cachuchu, una de les aries de mayor biodiversidá del nuestru llitoral, asitiada frente a Llanes, acaba ser nomada la primer «Area marina protegida de España». El trabayu fechu pol Grupu d’Investigación d’Ecosistemes del Marxen Continental (Ecomarg), del Institutu Español d’Oceanografía, mereció’l premiu BBVA a les «Actuaciones en Conservación de la Biodiversidá en España».
El Cachuchu ye un macizu d’un tamañu equivalente a los Picos d’Europa, que surde dende 4.5oo metros del fondu del mar Cantábricu, a una ralura de 65 kilómetros de la costa. La investigación del Ecomarg, tien permitío l’estudiu de la riqueza biolóxica y les condiciones de conservación d’esta cordillera somarina, un ecosistema únicu con gran diversidá, onde esisten cuasi mil especies, de les cuales más de cincuenta son nueves pa la ciencia.
D’ehí la pergrande importancia de la conservación d’esti patrimoniu únicu, que podría ponese en pelligru poles pesqueríes «de fondu». Anque n’actualidá tán prohibíes, el fechu ciertu ye que suel haber abonda polémica porque la flota pesquera vasca aveza a andar per esos llares, «tocando les narices» coles sos redes d’arrastre. Hai que facer una vixilancia en serio pa preservar esta riqueza de les manes especuladores. Per otru llau, según dalgunos espertos, Victoriano Sierra, por exemplu, «algunes mases corales yá tán dañaes pola contaminación de les agües», lo qu’amuesa la necesidá d’una mayor, entovía, proteición per parte les autoridaes.
Llamentar, per último, que nuevamente los foriatos vienen a camudanos los nomes de les nuestres coses. Asina, en llugar de llamar a esa estaya del nuestru llitoral col so nome tradicional, el Cachuchu, esti grupu investigador púnxo-y como nome oficial el de «Banco Le Danois», «en honor al investigador francés que lo descubrió en 1948″. Y eso ¿a quién-y lo consultaron? Cualquier día van cambianos hasta’l nome del nuestru país.
