Esti añu rompí con una vieya y prestosa costume y nun fuí a nenguna manifestación del día 1 de mayu. Podría disculpame delantre de mí mesmu, porque la verdá ye qu’ando con esi «gusarapín» que produz males nel estómadu que se manifiesten, testeronamente, perriba y perbaxo, pero lo cierto ye que nun fue esi’l motivu de la mio ausencia. Cenciellamente ye que cansé. Cansé d’un actu repititivu que se cellebra una vez al añu, lo mesmo que’l Día de la Madre o el de los Güevos Pintos, como si hubiere que lo facer pa sentir que se ta faciendo dalgo. Nun sé si m’esplico.
El momentu nel que tamos, pese a la engañifa esa de la salida de la crisis (¡saldríen ellos!), ye malísimu. Un momentu de xuro afayadizu pa protestar, pa manifestase, p’amosar el nuestru descontentu. Frente a esos números que los políticos del PP remanen, como magos tramposos a los que se-yos ve’l trucu, ta esi informe de Cáritas, a la que por cierto anden faciéndo-y inspecciones pa ver si la pueden h.oder (perdón) por dalgún llau, un informe con un datu mui cenciellu que toos podemos entender: Nel añu 2013 había n’España 11,7 millones de persones en riesgu d’esclusión social. 4,4 millones más que nel 2007, con un aumentu del 60,6 %. Esto ye’l resume, claru y concisu, de la situación económica del país. Lo demás son xuegos malabares colos númberos y coles cifres: que si’l paru estimáu, que si’l trabayu destruíu, que si castañes pilongues. Cuasi 12 millones d’españoles tán a puntu de dexar de ser ciudadanos normales pa pasar a ser una especie de mendigos, al marxe de la sociedá. O eso atalanto yo que significa tar «escluíu socialmente».
Poro, la necesidá de facer dalgo, dalguna clas de protesta ye más necesaria que nunca… y ensin embargu, nun me veo representáu por eses organizaciones qu’entamen los actos del 1º de mayu. Paezme que son organismos burocratizaos que va tiempu que perdieron la illusión y, sobre too, el contautu coles bases, colos que lluchen por salir a flote, por sobrevivir. Igual nun soi yo’l más indicáu pa facer esta crítica, pues habrá xente que trabaye muncho más que yo nestos campos, pero digo lo que siento y cómo lo siento. Nun me veo como parte d’ellos nin de lo que representen, nin siquier nesti día en que lo de menos teníen de ser les sigles. Igual hai que dir dando pasu a otru tipu de coleutivos, d’organismos más vivos, con más contautu cola base y mayor democracia interna y esterna, o igual eso ye una utopía. Igual. El casu ye que, por primer vez dende que tengo recuerdu, falté a una mani del 1 de mayu. Y nun puedo evitar el tener mal cuerpu. O igual ye esi «gusarapín» que m’anda maricando per dientro. Igual.
