Como tolos años, volví a cayer nesi tópicu colorista ya inútil de la «mani» del día Primeru de Mayu. Y volví a cayer pese a qu’esti añu teníame xurao nun dir, pero nun sé qué me pasa que, llegáu’l momentu, dame pena nun tar, como si el toreru nun se santiguara enantes de la corrida, o el porteru de fútbol nun tocara’l poste mazcando una xaculatoria. Ye pura santería, como si convocare a los dioses n’axuda de los mortales. Toi seguru de que si un añu nun fuera nun me lo perdonaría, y andaría los otros 364 díes echando la culpa de tolo malo que me pasare al fechu de nun asistir a la manifestación.
Polo demás, y abúltame que siempre faigo la mesma reflexón, préstame esi dir al llau de desconocíos a los que namás me xune una protesta, más o menos silenciosa, escontra los malos políticos que nos desfaen la vida, los malos empresarios que idem. idem, los corruptos, los mentirosos, los qu’abusen del poder al nivel que seya, la Conferencia Episcopal, la Casa Real, la CIA, el Fondu Monetariu Internacional, la Merkelona… ¿Dixi que namás me xune…? ¡Coime, si lo compartimos too…! Pues eso. Amás siempre atopes cares conocíes, d’eses qu’igual nun ves el restu l’añu pero que, esi día, apaecen perellí como les margarites en primavera.
Y siempre hai, tamién, dalgo que t’enternez, o que te fai pensar. Dalgún pequeñu detalle que te diz qu’igual nun ta too perdío, y que les xeneraciones vinientes tán dispuestes a tomar el relevu de les anteriores, nun sólo la nuestra, sinón toles anteriores, polo menos dende los «mártires de Chicago» d’aquel 1886 que dio aniciu a too esto que vieno depués. Esti añu esi detalle fue una moza, d’unos 18 0 19 años, con una pancartina superpequeña d’eses de fabricación
casera, que ponía solamente: NO. Nun desplicaba a qué diba empobinada la negación, si NO a los políticos, a los desahucios, al paru, a la situación en xeneral… Sólo esa pallabra, pequeña pero rotunda, de dalguién «resistente». Que nun ta dispuesta a dar el brazu a torcer, a plegase, a facilita-yos el camín al desgobiernu y a la desvergoña. Una simple, una cenciella pallabra: NON (a ella entovía-y sobraba una lletra) Quiero creyer qu’esi «non» ye un primer pasu hacia’l futuru, hacia una sociedá nueva y un sistema nuevu, porque de too esto que nos ta pasando, al marxe d’aneudotes más o menos gordes, la conclusión dafechu ye que’l Sistema Capitalista nun val. Que ye dalgo del pasao. Que nesti momentu, ya nun ye capaz de crear trabayu, nin riqueza, nin estabilidá que de dala manera pudieren xustificar, como n’otros tiempos, la plusvalía del capitalista. Ye un sistema dafechamente caducu, amortizáu, que nun val pal futuru porque ellos mesmos lu llevaron al espeñaderu. Y les fuerces sociales, non agora, non nos prósimos años, pero sí cuando se dean les condiciones pa ello, lu valtiará, como valtió la esclavitú y el feudalismu cuando dexaron de valir.
Non, si yá sabía yo que ficiere bien diendo a la «mani» del Primeru de Mayu. Un actu avezáu, rutinariu si queréis, pero que siempre me da pa tirar de dalgún filu. ¡Ah! y gracies, moza de la pancartina, pol to rotundu NO.
