Cola prosimidá de les eleiciones, al gobiernu municipal xixonés del PSOE entró-y una especie de «virus» inaugurador y nun hai día en que nun se nos inaugure dalgo. Parques, monumentos… La ruta del Cervigón ya cuasi nun tien requexu nel que nun llantaren una cosa rara que llamen escultura. ¡Serálo!
Agora, en plenos Xardinos de la Reina, xunto al muelle llocal, mangaron unes lletrones horroroses, de munchos metros d’altes, por otros cuantos d’anches, que ponen, si yes quien a descifralo, «Gijón». Ta bien que lo pongan, porque con tantu estorbu na via pública nun vamos saber ónde tamos viviendo. Los ciudadanos queremos que les ciudaes seyan, cada vuelta más, llugares diáfanos, onde poder pasiar ensin pelligru de chocar escontra dalgo. Onde poder columbrar el paisaxe, sobre too si se trata d’un tan guapu como’l mar. Pol contrariu, los nuestros munícipes tán emperraos en llantanos lo qu’ellos llamen pomposamente «mobiliario urbanu». Compadezo a los ciegos que tienen de tar desesperaos chocando en cada esquina.
Pero nun ye sólo que les nueves «lletrones» recién llantaes seyan una estorbisa y torguen la vista de la mar, ye que, amás, incumplen dafechu cola normativa billingüe onde’l nome oficial de la ciudá ye Gijón/Xixón. Y ¡qué oportunidá más guapa pa ponelo n’asturianu y dar a los forasteros un motivu más pa valorar la nuesa cultura!
Pa remate, la prensa llocal, que «toca d’oyíu», en llugar d’esperar a que seya la xente del pueblu la que-y ponga un nome popular al asuntu, apresúrase yá a bautizala, col mal gustu de «las letronas». Como si a otros llugares emblemáticos los llamáramos «La loca del rinconcito», «El aseo de King-Kong» o «Las chapotas». ¿A ónde dirán por ellos? ¡Manda madre!
