close
Patxi Andión

Patxi Andión

Había yá munchu tiempu que-y perdiere la pista, por ello, cuando lleí l’anuncia de que morriere nun accidente de coche viniéronme al maxín munchos recuerdos de les sos primeres andances. D’aquella, años 70, yera un personaxe bastante raru, ná que ver con otros cantautores de la dómina qu’gual yeren más profundos nel fondu, pero menos nes formes. Patxi, dotáu d’una voz ronca mui propia, un poco aguardentosa, cantaba como a cañonazos. Más que cantar paecía qu’insultaba, poro toles sos canciones paecíen «de protesta», anque munches non lo yeren. Dexé de siguilu pronto, en cuantes principió aquella rellación con Miss Mundu. Non por nada, probe, qué culpa tenía él. Pero ficiéronlu carne de revista y eso quitó-y munchu poder reivindicativu. Lleo agora que militó en grupos antifranquistes, como’l FRAP, cosa que nun sabía. Y que fue marineru. Una vida rica, seguro. D’él tengo un discu mui raru, porque los vinilos d’aquella dómina yeren de 45 revoluciones (los pequeños) o de 33 (los grandes llamaos LPs), pero esti ye d’un tamañu intermediu, abúltame que lu pidí al Círculu de Llectores, qu’agora ta tan de moda porque quier desfacese de los sos fondos editoriales. Nun sé si esti que tengo dirá nel lote. Voi poner como recuerdu pa min, y pa cualquiera de vosotros que quiera recordalu, una canción d’amor (que les tenía guapes) na que me presta sobre too la música y l’estribillu, porque’l restu la lletra ye un poco desllavazada. Títulase «Si la ves», y ye esa que va darréu. Creo que recueye perbién les esencies del cantante. Que la tierra-y sea leve al amigu Andión.