Nun seré yo’l que me meta na polémica fratricida entamada nel somantu del PSOE. Nengún interés personal tengo nun partíu que n’Asturies lleva demasiao tiempu enfrentáu a los intereses del País: la so llingua, la so cultura, inclusive los sos intereses económicos como cuando los representantes asturianos votaron en Madrid escontra la variante de Payares pa favorecer otros intereses, siempres abangaos a los petites de Madrid. Pero un nun dexa d’asombrase como espeutador d’un panorama que más paez una llucha ente pirates de la Malasia que de discrepancies polítiques ente collacios d’una mesma -o paecía- ideoloxía.
Y ye que l’actuación de los contrarios al actual Secretariu Xeneral, don Pedro Sánchez, ye d’una violencia política
(cuido que nun acabe tamién na otra) inimaxinable. Dirixíos por un diariu El País dafechamente enlloquecíu escontra Sánchez, baxando al insultu personal más cuciu, dalgo que nunca viere nun periódicu qu’en dalgún tiempu fue (o dixo ser) la lluz de la democracia, desatóse una campaña d’ambición y poder al toque de degüeyu. Con una actuación vergonzante de los grandes popes socialistes, encabezaos por un Felipe González que va tiempu que ye una caricatura de sí mesmu, tán utilizando tolos sos poderes, personales y mediáticos pa descabezar a un compañeru que, nun hai que lo escaecer, fue elexíu pal puestu qu’ocupa por votación direuta de la militancia.
Creo que Pedro Sánchez fue cobarde al nun querer, daveres, esplorar realmente la posibilidá d’un gobiernu d’izquierdes xunto con Podemos. Ye verdá que l’actuación un poco «cantinflesca» de Pablo Iglesias nun daba muncha confianza, pero asina y too Sánchez nunca lo intentó daveres, perdiendo’l tiempu con aquella alianza con Ciudadanos que nun tenía -como se vio- nengún percorríu. Agora ta pagando esa cobardía, enzarráu nuna cai ensin salida ya intentando apelar, como últimu recursu, al bote salvavides de la militancia que lu encumbró, por si pudiere salvar el pelleyu. En cualquier casu, gane quien gane nesta llucha fratricida, toos perdieron yá. Lo que quede del PSOE van ser namás filtrayes d’aquel partíu que llegó a gobernar con una mayoría nunca conocida na democracia española. Y la derecha descoyonándose de risa. ¡Qué país!
P.S. Poco depués de colgar esta entrada entérome de la dimisión de Pedro Sánchez. Taba cantao. «RIP.PSOE»
