close
Pequeñu repás a l’actualidá eleutoral

Pequeñu repás a l’actualidá eleutoral

Nun fai falta dicir que llevamos de preparativos eleutorales dende los tiempos del cuplé. Unos lleven pidiendo les eleiciones dende la espulsión del señor Rajoy del Paraísu, (por cierto, ensin una tacha llegal que poner, nada de ¡Pedro “okupa”!) y otros, los que gobiernen, como la rapiega: con un güeyu nos Decretos-Llei y otru nes urnes a les que, más  menos tarde, taben abocaos. Una aburrición y una perda de munchos meses pa que’l Parllamentu Español faiga lo que s’espera d’él: llexislar ya intentar iguar los abondos problemes que tienen los ciudadanos d’esti país.

Bueno, agora yá tán convocaes les famoses eleiciones y yá los partíos y coaliciones principien a mover fiches pa, como nel axedrez, a ver quién ye a dar l “échec au roi”, que diríen los franceses, o’l “xaque al rei” que diríemos nosotros. Si pue ser “mate”, meyor. Pa ello, asistimos a lo que suel pasar siempre nestes circunstancies: per un llau, el desembarcu de paracaidistes, per otru, los fichaxes de rellumu, y per último, los movimientos de los políticos a los que ya se-yos pasó la época, pero que nagüen por siguir cerca’l poder.

N’Asturies los paracaidistes tán a la orde del día. El Partíu Popular d’eso sabe muncho. Pasó penriba de la eterna perdedora Mercedines Fernández, que yera la presidenta del partíu, pa mete-y un par de goles “de chilena”. Como la eterna perdedora nun tien la vergoña torera de dimitir, agora sal con sonrisa cucia apegada al poder madrilanu, que ye’l que manda, pa ver si la coloquen nun puestín. Home, eso del Senáu siempre funciona. Ellí van morrer los elefantes. A la hora de meter la pata tien l’ayuda, impagable, d’un tal Alberto López-Asenjo, candidatu a l’alcaldía de Xixón qu’acaba dicir que “Foro y Vox tienen la misma raiz que el PP y acabarán en una sola familia”. Por si había duldes (la mía non), son lo mesmo qu’un partíu d’estrema derecha que quier volver a los tiempos del franquismu. Bien, Albertín, creo que los dexaste contentos.

Esta vez tenía puestes esperances nel PSOE. Depués de tantos años (¡décades!) de posicionase a la escontra de la nuestra llingua materna, el grupu llamáu “Socialistes pol asturianu” y la propia actitú del actual cabezaleru, Adrián Barbón, ficiéronme camentar nun cambiu dafechu na so sensibilidá asturiana. El fechu de nombrar asesor pal cambiu del Estatutu d’Autonomía a un personaxe como Bernardo Fernández, nidiamente posicionáu escontra la nuestra llingua, y de cuyu valir políticu tengo series duldes, nun fala bien del nuevu Secretariu Xeneral, que paez tener que replegase escontra esos, vamos llamar “barones de caleya”, que pululen polos suétanos del partíu. Sería mui malo, pa él y pa nosotros, que se dexase manipular por families o camarilles que yá xugaron el so papel históricu nel nuestru país y que quieren siguir mandando baxo cuerda. Col fallu añadíu de nomar a la cabeza de llista por Xixón, persona que nun conoz el verdaderu calter de los xixoneses nin les coraes de la ciudá, ya tendríen bastante.

Los de Podemos (¡qué feo ye eso de “podemitas”!) acertaron, en cambiu, cola moza qu’opta a alcaldesa de Xixón, Yolanda Huergo, persona honrada y competente, esperta y lluchadora. Llástima que, a otros niveles, el partíu ande con muches inseguridaes reflexu, seguro, de les que tienen n’otres estayes superiores. Esperemos que nun finen “autodestruyéndose”, como les grabaciones de la serie “Misión imposible”, que lo facíen en cinco segundos.

Álvaro Muñiz paezme un bon recursu pa Foro, un bon xestor, pero abúltame que’l partíu perdió’l so sitiu como partíu de centru-derecha p’alliniase cola derechona más rancia. Y nada espero, tampoco, del partíu d’esi “Mister Chance” que se llama Prendes y que va colos de la feria y vuelve colos del mercáu. D’Izquierda (des)Unida nun hai señales. Bueno, otru día más, porque esto va a dar pa muncho. Chau.