close
Perdona, Quini, amigu

Perdona, Quini, amigu

2018-02-28El MolinónQuini380Visitas

¿Qué más pue dicise? ¿Qué novedá podríemos aportar a esta avalancha, a esti tsunami de frases, opiniones, deseyos, alcordances, oraciones…? ¿Qué amestar a les imaxenes, los comentarios, los lloros, les emociones ya espresaes? Nada, daveres. Véome incapaz de dicir dalgo que yá nun se dixere. Falaron los futbolistes, nuevos y vieyos, los direutivos, los políticos, los aficionaos, sobre too los aficionaos y, milagrosamente, xuníos nel dolor… Queda, entós, namás dicir que sí, qu’un tamién se suma a too ello, que Quini, el gran Quini tolo merez. Y, ensin embargu, toi llegando a un puntu en que me paez que too esto ye un poco demasiao. Qu’escede. Que sobrepasa. Que me cuesta o, cenciellamente nun puedo, compartir lo de los “altarinos”. Lo de Xixón a los tos pies. Lo de los Guardianes del Templu. Lo de los recordatorios y los ex-votos… Tal da la impresión de que tienen razón los cures y la ilesia, de que necesitamos dalguna trescendencia anque seyamos laicos. Pasóme igual, pero menos, cuando lo de Preciado. Somos escesivamente escesivos. Y conociendo un poco a Quini, depués de tantos años de tenelu ente nós, abúltame qu’a él tamién-y paecería escesivo. Gran xugador, gran persona. Qu’amaba a la so tierra, Xixón, Asturies. Que fue, como diría don Antonio Machado, “en el buen sentido de la palabra, bueno”. Y que quiciás refugara tanta “bambolla” como se ta produciendo hasta agora. El fútbol propende a los escesos, namás hai que velo los domingos nos estadios. A favor y a la escontra, polo que pidir medida ye una prédica nel desiertu. Pero lo que nun podemos -paezme a min- ye crear d’eso una “mística”, una nueva relixón colos sos santos, martires, efemérides y reliquies. O seya que sí, súmome a cuasi too, y siéntolo tanto (o más) que los de los ex-votos. Pero munches veces les perdes hai que les llevar por dientro o, cuando menos, con un migayu de contención. Asina que, perdona, Quini, amigu, pero creo que nos pasamos.

Nota.- Quini merez tolos homenaxes que se-y faigan, pero’l nome d’El Molinón ye parte importante del Sporting y de Xixón, y un de los últimos estadios que caltién el so nome tradicional. Por favor, non lu tocar.