Hubo un tiempu, por suerte yá finiquitáu, en que n’España había que tener contentos a los militares por mieu a que, como asocede nos paises tercermundistes, pudieran en cualquier momentu dar un golpe d’estáu. Esa fue una de les herencies que nos dexó’l Xeneral Franco, llegáu al poder pola fuerza de les armes y calteníu n’él pol sofitu incondicional del exércitu. Esos «tics» dictatoriales, y esos tiempos en que l’exercitu yera’l guardián/secuestrador de la sociedá española finaron cola intentona del 23 F. D’entós p’acó, los militares pasaron a ser lo que nunca debieron dexar de ser: unos funcionarios más, a los que la sociedá española-yos entrega unes armes pa que la defendan, nel improbable casu de ser atacada por paises estranxeros. Igual que a los mélicos-yos da los quirófanos y l’instrumental, a los maestros les aules y el material escolar, y a los alministrativos los ordenadores y los bolígrafos, a los soldaos, seyan de la graduación que seyan, dámos-yos los fusiles y los cañones pal so bon empléu. Igual que’l restu de los funcionarios públicos, los militares tendrán les sos propies opiniones polítiques, talo que les tengo yo o pue teneles la muyer de la llimpieza. Unes opiniones personales mui respetables, tanto como les de los demás, a nun ser que vaigan escontra les lleis que nos dimos. Nesi casu dexaran de ser respetables.
Esti día cellebróse nel Salón del Tronu del Palaciu Real, la llamada Pascua Militar, na qu’intervinieron les más altes
personalidaes polítiques del estáu: El Rei, el Presidente del Gobiernu y el Ministru del que dependen los militares, o seya, el Ministru de Defensa. Pues bien, esti paisanu, de nome Pedro Morenés, que nun sé si fizo la mili como la fici yo, déxase dicir nun momentu del so discursu que los militares «están preparados, mantienen el ánimo firme y sereno, sin atender a absurdas provocaciones, y cumplen calladamente con su deber», refiriéndose al debate soberanista que nestos momentos refierve en Cataluña.
Y yo entrúgome: ¿Pero, bueno, en qué país tamos? ¿En qué época nos alcontramos? ¿Nun hai naide que revise los discursos de los ministros enantes de que se llean? ¿O ye que les altes instituciones del Estáu tán d’alcuerdu coles pallabres del ministru? Pa empezar, ¿qué ye eso de les «absurdes provocaciones»? Podrá gustanos más o menos l’actitú del llexítimu gobiernu de la Generalitat que, por cierto, tamién ye una institución del Estáu, en rellación al tema de la soberanía. Podrá, inclusive, paecenos que ye innecesario lo que quier facer, o mesmamente illegal, pero en negún casu valoralo como una «absurda provocación». ¿Ye una absurda provocación la intención de Quebec de separtase de Canadá? ¿Yelo por parte d’Escocia respeutu al Reinu Xuníu? Podrán tar acertaos o non, pero llamalo, delantre de la cúpula militar «provocación» si que suena, daveres, a provocación.
Y llueu, esa apelación al «animo firme y sereno» del exércitu, qué pretende dicir, ¿que los militares podríen desmandase y emplegar les armes que-yos dimos escontra Cataluña? ¿A qué se refier el señor Ministru de Defensa con lo de que «cumplen calladamente con su deber? ¡Coime, como tien que ser! Cumplen col so deber como los mélicos, los maestros, los alministrativos y los xueces. Y el que nun quiera cumplir col so deber que se dé de baxa y se dedique a otra cosa. Toi un poco fartu d’eses velaes amenaces que siempre apelen, como’l que nun quier la cosa, a qu’ehí ta l’exercitu «por si acasu». ¿Por si acasu qué, don Pedro Morenés? ¿A qué tenemos que tener mieu?
P’acabar bien la cosa, nun momentu en que tola sociedá protesta na cai polos recortes, que tán acabando cola sociedá del bienestar, al Rei nun se-y ocurre más que pidir que se caltengan los presupuestos pa los militares, ye dicir, que queden al marxe de los recortes que sofrimos toos, en defensa de los intereses d’España. ¿Cualos son los intereses d’España, señor Borbón? Díganoslos usté, que tuvo que pidir perdón al pueblu español pola so conducta impropia. En fin, daveres que too esto da pena y retrotráinos a unes dómines, por suerte ya superaes, anque paez que dalgunos siguen echándoles de menos.
