close
Pingarates catalanes

Pingarates catalanes

Poques veces un tema tuvo más enguedeyáu qu’ésti de Cataluña. Va yá un tiempu que s’aparcó la racionalidá, el diálogu, la sensatez… pa dar pasu a un volcán de sentimientos que paez arrollalo too. Dicen los nuestros amigos catalanes que lo peor de tou esti procesu fue la resquiebra, la ruptura que se fizo na sociedá catalana que llevó a enfrentar, como na nuestra guerra civil, a hermanos escontra hermanos. El problema ye que cuando calla la racionalidá y falen los sentimientos ye poco lo que pue facese pa solucionar les coses. Amás, l’actualidá sucédese con tal celeridá que lo  que dices o pienses güei, queda obsoleto, avieyucao, mañana mesmo. Como siempre me presta opinar sobre les coses, a fuer de tar enquivocáu, y a tenor de quedar desmentíu nun prósimu futuru, voi filvanar dalgunes observaciones personales ya intransferibles, pa que nun se diga.

1.- Como dixi n’otres ocasiones, a min dame igual que los catalanes se separen o non. Nin defendo la so independencia, y menos d”esi absurdu mou en que lo tán faciendo, nin me presta n’absoluto eso de la “unidá eterna d’España” que, amás, ye una mentira gorda porque esa unidá ye bastante reciente. Si tengo de tomar partíu (que nun tengo por qué) prefiero que Cataluña siga siendo del Estáu Español porque eso beneficia a Asturies que ye lo que a min m’interesa, pero más allá d’eso, nada.

2.- Nun ye ciertu esi eslogan de que n’España nun hai democracia porque los catalanes nun pueden votar. Los catalanes, como toos nosotros, tán fartucos de votar. A partíos independentistes, estatalistes, d’izquierdes, de dereches y mediopensionistes. De fechu, la composición del actual Parllament que ta llevando lo del “procesu” salió d’una d’eses votaciones. Una votación que, por cierto, dio mayoría de votos a los non independentistes. Abúltame qu’eso tamién ye  pronunciase. Y si non, que’l señor Puigdemont convoque nueves eleiciones yá verá como pueden votar, y munchos, al so partíu.

3.- Esa Constitución qu’agora tanto se critica, porque nun-yos val, votáronla ellos mui contentinos, y dalgunos notables catalanes participaron na so ellaboración. La verdá ye que, aquellos tiempos, nada nun tienen que ver con estos y como nin hai verdaes eternes nin tampoco lleis, ye llegáu’l momentu de modernizala. Pero pa eso habrá que se sentar, charrar y facer propuestes. Eso de que, como nun me gusta me la salto, nun tien un pase.

4.- Lo mesmo colos tribunales. Nun pue dicise, como el señor Rufián (mal nome pa un políticu), que nun son democráticos y que son fascistes. La forma de eleición de los xueces, anque nun ye igual en tolos paises, ye perfeutamente democrática, escuéyalos el Parllamentu, los propios xueces o una cosa mixta. ¿Cómo quier facelo, de forma asamblearia? La impresión que me da a min ye que’l señor Rufián sabe poco, o polo menos pasó poco, polo que ye un estáu fascista. Que-yos lo entruguen a los miles de muertos de les carreteres.

5.- La torpeza de la estratexa del Partíu Popular, primero, y del propiu Gobiernu de Rajoy, depués, nun tien llendes. Xugaron con fueu nel tema catalán y agora faen falta munchos bomberos p’apagalu. Quixeron el votu “españolista”, porque-yos salía rentable ellectoralmente, y nun fueron capaces d’un diálogu sinceru con delles partes del Estáu. El llamáu “problema catalán”, como’l vascu, nun ye d’agora, pero ellos encargaronse d’engafentalu hasta llendes impensables.

6.- Ye verdá que l’aniciu del actual problema, como dicen los catalanes (nun sólo los independentistes) fue la impugnación del Estatut delantre del Tribunal Constitucional, cuando yá fuere aprobau nel Parllamentu catalán y nel Parllamentu español. Y l’anulación de parte del mesmu cuando n’otres comunidaes (Valencia) yera práuticamente igual. Eso, repito, ye verdá. Pero, nun hai que ser inxenuu. A mediu plazu, los independentistes nun diben a conformase con eso. A la vista lo visto, l’Estatut sería un reblagu más nel so camín hacia la independencia. Anque la so aprobación, tal y como taba, tuviere dao un marxen de tranquilidá social y política.

7.- En política ye mui importante’l tema de “la oportunidá”. ¿Por qué agora? ¿Por qué un tema tan antiguu como’l de Cataluña y el so encaxe nel estáu sal precisamente agora y con tal virulencia? A dalgunos mal pensaos danos por creyer que, tanto por parte del Gobiernu catalán como del Gobiernu español hai coses que tapar. Que tapecer. Que distrayer. Per parte catalana eso del 3%, les comisiones, les trapicheríes, los pufos y el mal estáu de “la cosa pública”. Y per parte española esa vergoña de la que tan poco se fala, como ye’l famosu rescate a la banca española, de la que se recuperó una mínima parte, produciendo un deficit públicu superior a los 45.000 millones d’euros. ¿Quién s’alcuerda agora d’unes coses y d’otres? Naide.

Miro pa lo escrito y veo que me pasé abondo del espaciu. Pa otru día comentaré dalguna “pingarata” más. Espero que naide se sienta ofendíu por nada de lo que dixi, pero si ye asina… ¡qué se va a facer! Un tamién tien derechu a enquivocase.