DEL CONCEYU.- Don Gabino de Lorenzo, ínclitu alcalde d’Uviéu per munchos años, punxo de moda aquello del «cercu a Uviéu», tal y como si de la Guerra Civil tuviere falando. Aquello yera una «boutade» qu’encartiaba pa emplegalo cuando les coses nun-y pintaben bien en casa. Pero lo que denuncia agora la Casa Conceyu xixonesa nos mesmos términos («el cercu a Xixón») paez tener dalgún más aquello de realidá. Los datos económicos y les matemátiques nun engañen. Como l’algodón.
DEL PAÍS.- La sensación de qu’Asturies nun ta suficientemente defendida nes instancies estatales ye ca día más fuerte. Siguen tomándonos el pelo dende Madrid y dende Europa. Nes coses grandes, como’l «cara bugre» esi d’Almunia, perdedor de toles eleiciones a les que se presentó y qu’agora va de «mocín», que ta faciéndonos un flacu favor colo de los astilleros, hasta coses nes que les protestes asturianes se les pasaron «pol forro», como lo de los nomes de pueblos y ciudaes na señalización viaria estatal. Viniendo esti día de Madrid fui a ver, como siempre, «Gijón», «Oviedo», «Langreo», etc. etc. ¿Nun quedamos que los nomes oficiales son los que decide’l Principáu? Si, ho…
DEL ESTÁU.- Nun soi a entender la cobardía política de Rajoy. Un Presidente del Gobiernu, tenga o nun tenga mayoría
política, debería salir a la palestra a dar desplicaciones de los asuntos importantes que tán na cai. El tema del famosu caradura Bárcenas, algamó yá tal escandalera que nun pue siguir abellugáu pola so Guardia Pretoriana pa nun comparecer nel Parllamentu. Debiere ser él mésmu, el que lo pidiere y si hai que se disculpar polo fecho enantes, facelo honradamente y depués esperar el dictamen de la xente. Prefiero un Presidente valiente, qu’asuma les sos responsablidaes anque s’enquivoque, qu’un cobarde que s’escuende tres otros pa nun dar la cara. ¡Allá él!
DEL MUNDU.- L’actitú servil de lacayos de los EE.XX. per parte de Francia, Italia, Portugal y España nun tien perdón. Nun pue tratase al presidente d’un país, de nengún país, como ficieron ellos con Evo Morales. Agora los paises de Mercosur llamen a consultes a los sos embaxadores y la OEA fai una protesta formal. Tienen razón. Imaxinemos per un momentu que la cosa fuere al revés, y que al señor Obama lu retuvieren nun país sudamericanu, escontra la so voluntá, ya-y negaren el so pasu per dellos otros paises. Al día siguiente tendríen a los «marines» a la puerta casa. Pues el casu ye’l mesmu, porque la dignidá y la inmunidá del cargu nun tán en que’l país seya más o menos poderosu. Siguimos como nel Far-West, gana siempre’l más fuerte. Y España, como davezu, faciendo’l payasu nun tema nel que-y va muncho, polos intereses que tien en toos aquellos paises. Y pa encima, los norteamericanos salieron»de rositas», como si la cosa nun fuere con ellos. Y ye que los hai faltosos…
