close
¡Puxa la Reciella!

¡Puxa la Reciella!

2015-10-05Reciella 2015516Visitas

ReciellaY eso ye precisamente lo que fai la Reciella: puxar. Y les families que formen esa guapísima asociación que se subtitula: «Families pol asturianu» tamién. Una asociación que tien tolos mios respetos y debería tenelos de tola sociedá asturiana pola fin que busquen: l’aprendizaxe y l’usu de la nuestra llingua nel marcu del llar, de la familia. Y ye que de poco val mandar a los neños a clas d’asturianu si llueu, en casa y na vida social de tolos díes, nun sienten qu’eso, esa llingua qu’aprenden colos maestros, nun tien un valir y una continuidá na so cotidianidá.

Poro, tolos años per estes feches, l’asociación «Reciella» cellebra’l so día nel marcu del Pueblu d’Asturies. Y ellí hai xuegos, competiciones, bailles y… bocadiellos. Esti añu, pese al bastiazu que cayó a primeres hores, la fiesta tuvo mui animada. Nosotros pasemos perellí un cachu y dionos tiempu de saludar a muncha xente: a Rubén Llames, a Couto, a Marisa López Diz, a Inaciu Galán, a Samuel el de Trabe, a Damián Barreiro, a David el de l’Academia, a Iris ya Ivan y … y a tola recatafila de neños y neñes que xugaben a la rana, andaben en zancos o facíen de cocineros con unos gorros guapísimos autofabricaos, col so nome escritu. Día de folixa, pero tamién de concienciación. Munchu méritu tienen estes families que lluchen por esparder la nuestra guapa llingua y tresmitila a les nueves xeneraciones que son les que tienen que garrar el relevu. Ensin ellos, nin oficialidá nin puñetes…
(Semeya del autor)