Tuvi esti visitáu blogue (polo visto hai munchu ociosu como yo) dafechamente aparáu pola mor d’un obligáu viaxe a tierres galaiques. Un viaxe que m’encartió pa desconectar del mio País (Asturies), y del restu l’Estáu. Viénome bien desdexar per unos díes a la Prima de Riesgo, a los recortes, a les mentires repitíes de los políticos y a les carones de la Merkel, del Rajoyu y d’esa del pelo blanco que creo que ye dalgo del FMI y que tien pinta de bruxa de cuentu popular. Y como al llegar a casa lo primero que me recibió fue un bastiazu, y lo segundo’l partíu de la Seleición Española, mentanto me pongo al día d’otres novedaes, escribo un poco de fútbol.
Ya tamos na final. Una meta que nos autoimpusimos dende l’aniciu, d’ehí la non cellebración de trunfos «menores», tal y como otros paises ficieron, que se daben unos abrazones pergrandes por ganar un modestu partíu de clasificación. Tovía hai clases. Nosotros principiamos a abrazanos na semifinal. Y llegamos a la final, al mio modestu entender, con un xuegu namás que «regulín», si lu comparamos col d’otros eventos asemeyaos. Hai dellos fautores qu’influyeron n’ello. Yo apuntaría dos, pero de xuro qu’hai más. Ún el
cansanciu d’unos xugadores que lleguen a esti campeonatu fartucos de partíos, la mayoría en tres o cuatro competiciones, y que supón, nun solo un cansanciu físicu, sinón tamién mental. Ye imposible caltener la concentración, al altor que se requier, depués de tantes «finales» y tantos «partíos del añu» como tienen xugao nesta temporada. Y otru fautor que, al mio xuiciu, que nun ye tan modestu porque creo qu’entiendo bastante, influyó en qu’esi xuegu resultare «regulín», fueron les alliniaciones diseñaes pola «esfinxe». Esi home educáu, de nervios templaos y que nunca nun s’alteria (¡qué tendrá que ver too eso col fútbol!) que nos fartucó de xugadores bonísimos pa dar l’últimu pase, pero que nun lu teníen a quien dar, teniendo que s’arreglar ellos solos pa xugala, centrala y rematala. Fáime gracia que llueu los periódicos vengan diciendo: «Del Bosque acertó otra vez colos cambios». ¡Coime, si acertó colos cambios ye que s’enquivocó cola allineación! Total, que tuvimos regalando medios tiempos a los equipos contrarios, hasta que se-y ocurrió «acertar», metiendo a dos puntes que derrompieron la defensa enemiga. Y suerte tuvimos qu’esi xugador de Portugal que ye, como él mesmu diz, «guapu y bonu», nun tuvo’l so día, porque pudimos nun llegar a la prórroga.
Sé qu’hai llectores d’esti blogue que podríen dicir: «Esti Oliva refalfia. Tamos con munches posibilidaes de ser Campeones d’Europa y namás que fai que poner pegues». Y seguro que tienen razón. Pero ye que con un piñu de xugadores como los que tenemos, hai que facelo a posta pa xugar mal (o menos bien). Nada que ver con aquella seleición con Torres (en meyor forma) y Villa, qu’asustaba a los contrarios. Agora los goles tien que los meter Xabi Alonso, que nel R. Madrid nun los «golía». En fin, a esperar a la final, y a ver si-y damos una oportunidá a Llorente, el «Rei Llión», que fizo una temporada de cine, y ponemos a Cesc nel sitiu que xugaba nel Arsenal y non de delanteru centru. Y probamos (que nuna final tamién hai que sosprender) con Juanfran nel llateral derechu, en llugar d’Arbeloa, que nun llegó nin una sola vez a la llinia de fondo pa centrar, tolo contrario d’un Jordi Alba qu’entró siempre que quixo hasta «la cocina» facilitando los remates de los compañeros. Arbeloa, para, controla y pasa al de llau o p’atrás. Y déxolo equí, que me falta práutica pa esto de la escritura y yá toi un poco cansu. Otru día más.
Post scriptum.- Veo’l partíu ente Alemania ya Italia. Italia va a ser un dificilísimu rival. Bien llantáu nel campu, zarrando espacios, xugando con dos puntes que se complementen (fuercia y habilidá) y un maxestuosu Pirlo en centru’l campu. Y físicamente como «motos». Van ser un gran contrariu. Alemania, a la escontra, una gran deceición. Navegó pel campu como una pantasma ensin orde nin conciertu. Resultáu xustu, pero curtiu. Alón