Viendo les cadenes de la televisión pública tal paez que tamos en plena dómina franquista: Mises, procesiones, saetes… nun mediu que debiere ser, tal y como la constitución recueye, propiu d’un estáu llaicu. Una cosa ye caltener determinaes tradiciones, cosa que siempres defendí, y otra que nos metan en casa y a toes hores unos cultos que, dende’l mio modestu talantar, rocen ya cola idolatría, convirtiéndose nun cantu «a la muerte», col aderezu de la Llexón y el so himnu «Soy el novio de la muerte». Pa echase a tremar.
Dientro d’esta ufierta relixosa tan llimitada y repetitiva, llegóme a traviés de la nuestra fía Iris una curiosidá que tenía mui bona pinta. Tratábase (trátase) d’un percorríu lliterariu pela Catedral d’Uviéu, en llingua asturiana. Ye dicir, el guía (un guía profesional, especialista en San Salvador y con un dominiu perfeutu del asturianu) diba llevándote peles distintes partes de la Catedral, esplicándote lo que víes y, al tiempu, lleendo dalgún pequeñu pasaxe d’una obra lliteraria n’asturianu que ficiera referencia a lo que tábemos viendo: Antón de Marirreguera, Teodoro Cuesta, Xuan María Acebal , Constantino Cabal y dellos otros más collaboraron a danos la so propia visión de lo que teníemos delantre los güeyos. El percorríu duró una hora y media y, la verdá, nun se nos fixo nada pesao. A la escontra, quedamos con ganes de más. Asina que’l grupu qu’acompañamos a Denis, el guía, y que seríemos unos 16, felicitámoslu y animámoslu a siguir con iniciatives d’esta clas. Culturales, sí, pero de la nuestra cultura. Una islla dientro de tantu «capirote».
