Ye un “mantra” de los que se recurre en toles tertulies por unos personaxes que salen na tele pa repetir tópicos y consignes. Dame la impresión de que la irrupción d’estos nuevos partíos -meyores o peores, esi ye otru tema- con una forma d’actuar distinta y unos oxetivos ayenos a los que hasta agora se plategaben pilló col pasu cambiáu, nun sólo a los partíos políticos llamaos “tradicionales”, sinón a esa panda d’inútiles interesaos que pueblen los espacios llamaos “de debate” de la tele. Toi falando, claro, del términu “populismu”. Tolo que faen, proponen o aplauden Syriza, Podemos y, en menor midida, Ciudadanos, ye populista. Inclusive’l términu llegó a calificar dafechu a los mésmos: “los partíos populistes”.
Un términu que paez querer usase -abaste sentir a Rajoy o a los Rajoyeros, o inclusive al propiu PSOE- por contraposición a la “seriedá” que sería la nota distintiva de los partíos clásicos, los tradicionales, los que nos traxeron hasta onde tamos. Dame la risa. Ye talamente la Orquesta del Titanic tocando valses, mentanto’l barcu se funde. Eso sí, mui seriamente.
Ayeri pela tardi, nel programa de TVE (que ye’l Boletín Oficial del Estáu) llamáu “24 horas”, punxeron a dos analistes políticos, paisano y muyer, a comentar la situación en Grecia. La pallabrina máxica fue en tou casu “populismu”. El “populismu” paecía ser el que llevare al país helenu a onde ta agora. Tsipras ye un populista, y el so gobiernu, y el so partíu, que van llograr que los tengan qu’echar del Euru, de la C.E. E y hasta del Mapamundi.
Pero la verdá ye que’l tal Tsipras y los que patronéen agora’l barcu griegu, lleven unos pocos meses
remanando’l “desaguisáu”. Un desaguisáu que principió aquel Gobiernu Conservador de Karamanlis (un partíu “seriu”, claro) que falsificó’l deficit del país durante dos llexislatures. Fecho ello cola collaboración necesaria y suficiente de la entidá financiera Goldman Sachs. Casualmente, el vicepresidente d’esa entidá -Goldman Sachs- yera un tal Mario Draghi.¿Suénanos? Home, claro que sí. Ye l’actual Presidente del Bancu Central Européu, una de les besties negres de los griegos y que, dende l’aniciu, sabía de qué diba la cosa.
Y depués del “seriu” de Karamanlis y los sos serios conservadores, llegaron al poder los socialistes de Papandreu, otru partíu seriu, qu’agravó entá más la situación del país, con decenes de miles de despidos de funcionarios, privatizaciones, redución del 40% de les pensiones, etc. etc. teniendo que llegar a cambiar a tola cúpula militar, en 2011, por mieu a un güelpe d’Estáu militar. Y tres unos años nos que’l Parllamentu Griegu nun atopaba forma de tener un gobiernu medianamente estable, apaecen los de Syriza que, estos sí, yá nun son serios. Son “populistes”.
Nun sé si l’actual gobiernu griegu, tal y como tienen el panorama que, esta vuelta sí que-yos vieno heredáu, podrá meyoralu o non. Pero al prósimu que-y sienta dicir dalgo rellacionao con partíos “serios” y partíos “populistes”, rómpo-y la cara.
