Publícase agora una llista de grandes defraudadores unviada pol Ministeriu de Facienda. Vienen nella nomes y empreses que deben millones d’euros a tolos españoles (facienda somos toos), a ti, a mi y a muncha xente, autónomos, pequeñes empreses… Ya va tiempu que conocíemos a dalgunos, como por exemplu, ente otros, l’ínclitu Messi o’l propiu F.C. Barcelona que fizo trampes col fichaxe de Neymar, declarando por menos del so costu real. Agora, ente los deportistes conocíos fíltrase’l nome de Dani Pedrosa, que tamién debe una bona tayada.
Lo curioso del casu ye que la xente, el pueblu llanu o con poca montaña, nun paez tener un gran cabréu escontra estos defraudadores, por culpa los cuales los servicios públicos funcionen peor, los probes tienen menos axudes y los demás tenemos de pagar más impuestos pa complementar lo qu’ellos nun ponen y pa que «papá» Estáu siga funcionando. A la escontra: sigue viéndolos con simpatía. Messi paséase trunfalmente pelos campos d’España y la xente apetigúñase pa pidi-y autógrafos. ¿El fraude? Nun importa: ye Messi. Igual esi caradura de Mario Conde, al que se rifen dellos programes patibularios pa les sos tertulies, pufista confesu que, amás, escribe llibros.
Equí nel nuestru País, lléganos tamién pola prensa, parcialmente, la llista de defraudadores asturianos y estráñame
ver ente ellos a miembros de la familia Cosmen. Sí, esos que fueron empresarios modelos.Recuerdo que a don José Cosmen Adelaida se-y concedió la Medalla de Plata de Asturias, fue Hijo Adoptivo de Oviedo y Doctor Honoris Causa de la Universidad de Oviedo. A la so muerte, recoyía La Nueva España la noticia de que los sos fíos heredaren «el mayor emporio societario y más diversificado en sectores y países que se haya generado en Asturias desde la segunda mitad del siglo XX». Pues bien, polo que se diz nesa llista, la familia Cosmen debe a Facienda más de 60 millones d’euros, ente les empreses «Anca Corporate» y «Jovellanos XXI», lo cuál nun ye poca cosa. Pues bien, estos señores defraudadores siguen contando colos sos «ecos de sociedá» como prohomes, trunfadores y xente a imitar. Asina, por exemplu, tovía nel númberu de La Nueva España d’esti domingu, nun espaciu llamáu Siglo XXI, dedíquen-y páxina con semeya pa que nos diga’l Cosmen de turnu cómo tien de ser un bon empresariu. Mientres, los ciudadanos de a pie, vémonos sangraos polos impuestos, direutos ya indireutos, que pagamos ensin rechistar. Bono, yo polo menos rechisto, anque paez qu’otros tán mui contentos colos que nun paguen. Los trunfadores. ¡Vivan las caenas!