Con gran aparatu de cartelería, la mineral “Agua de Cuevas” llanza una campaña na que, personaxes famosos de la vida social y deportiva asturiana dicen, na nuestra propia llingua, qu’ellos son d’Asturies y son de Cuevas.
Non poques veces dixi, y comigo los que defenden l’asturianu, qu’una llingua ye muncho más qu’un mou de comunicación. Una llingua ye lo que conforma un pensamientu, una forma d’atalantar (o nun atalantar) la vida y tamién un elementu aglutinador d’un pueblu, d’una xente que s’identifica con ella. Poro, lluchar pola llingua lllariega ye lluchar pol propiu pueblu asturianu, pola so cohesión, pol so desarrollu xuníu porque un siéntese partícipe de dalgo a comuña. Esi “nosotros” que ye tan importante a la hora entamar cualquier proyeutu común como grupu diferenciáu, como país o, si queremos, como Comunidá Autónoma.
Y el fechu de que les empreses asturianes empleguen la llingua propia pa facer la so publicidá, va a llograr qu’un s’identifique con elles, que les sienta como suyes. Nun quier dicise que vayamos a ponenos ciegos d’Agua de Cuevas, pero sí que si nel supermercáu vemos, por poner un exemplu, agua de Vichy y Agua de Cuevas, escoyamos esta última p’añadir a la cesta la compra. Creo que yá cunté n’otra ocasión que cuando tába estudiando en Bilbao, coincidí na mesma pensión con un rapaz catalán que s’apellidaba Güell Pipó. Y siempres me dexaba mui ablucáu ver cómo nel supermercáu nun garraba, como nosotros, los productos más baratos. Un día entrugué-ylo y la so rempuesta fue: “yo siempre que puedo garro productos catalanes, anquen nun seyan los más baratos”. Esti rapaz –falo de los años 60 del sieglu pasáu- nun yera nacionalista, pero sí sabía lo que yera facer patria. Nunca nun se m’escaeció aquella anéudota.
Bienvenida, pues, la campaña d’Agua de Cuevas que sirve pa vender, pero tamién pa facer patria. Y que l’exemplu prenda ente otres empreses asturianes. Yo, como Güell Pipó, escoyeré siempres al so favor.
