Va yá munchu tiempu que los que tenemos los enfotos políticos puestos nel nuestru País, Asturies, consideramos a los partíos d´ámbitu estatal «sucursalistes». Con esto queremos dicir que, pa ellos, Asturies nun ye una prioridá y que los nuestros intereses, los de los asturianos, tán perbaxo d’otros supuestos intereses «más importantes». El resultáu ye que los socesivos partíos del Principáu, ente los que llueu formen gobiernu, traguen con too cuando los que manden en Madrid son del mesmu partíu qu’ellos. Ya sabemos: Cuando’l PSOE tien el gobiernu del Estáu, el PSOE asturianu, oyer, ver y callar. Cuando lo fai el PP, el PP asturianu pola carril «de frente marchen». Esto acaba de vese, otra vuelta más, mui nidio col famosu repartu del deficit que llamen «a la carta». Meyor lu llamaben «el platu del día», porque na carta podemos escoyer y l’otru escuéyelu’l cocineru. Tolos partíos políticos asturianos tiráronse «a la yugular» del Ministru de Facienda, porque’l repartu de los porcentaxes de les deldes (coime, a ver cuando repartimos beneficios y non deldes) perxudica grandemente a Asturies. Bueno, toos… menos el PP, al que-y toca lo de «de frente march…» Pero sería lo mesmo en casu contrariu.
A min paezme qu’esto que digo ye dalgo que se ve «a vista cenciella», ye dicir, nun toi falando de grandes conspiraciones
«xudeo-masóniques», o d’esi complexu que tienen dalgunos nacionalistes de sintise «permanente agraviaos». Non. Esto ye daqué demostrable por cualisquiera que nun tenga «catarates polítiques». Poro, cuéstame entender l’actitú de gran parte del pueblu asturianu emperráu en siguir dándo-yos el votu a los mesmos que, nuna ocasión y otra, posponen los sos intereses, los de los votantes, por otros «superiores». ¿Qué ye, qu’eso que llamamos «pueblu asturianu» nun se cansa de perder? ¿Qu’una vez y otra ta dispuestu a regalar el dau más preciosu col que cuntamos en democracia, el votu, a eses sigles que lu engañen elleiciones tres elleiciones? Nun lo entiendo, daveres. Nun ye retórica, nun lo entiendo de verdá. Y prestaríame entendelo. Seguro que les otres opciones que se presenten nun son les ideales, que tienen munchos fallos, que nun cubren les espeutatives… Pero, home, anque namás fuere por probar… En fin, ocúrreseme esto al lleer nel periódicu que tolos partíos n’asturies, esceuto’l PP, tán pensando presentar un recursu al Constitucional. Yo si fuere miembru o militante del PP asturianu, y esto dígolo con esi tópicu sentimentaloide de «col corazón na mano», marcharía pa casa por nun sintime asturianu. Y la prósima vez votaría a los «Antitaurinos».
