Nun quiero quita-y nengún méritu al ex-comisariu y vicepresidente del Parllamentu Européu Antonio Tajani, sinón espeyar namás lo escesivos que somos los asturianos (los xixoneses en particular) y el mou que tenemos d’agradecer los favores. Porque lo que’l señor Tajani fizo, con bona mano y gran aciertu, fue lo que ye la so competencia: intentar iguar un problema de desllocalización d’una empresa, que quería marchase «de rosites» de les sos obligaciones pa cola factoría xixonesa y los sos trabayadores. Tajani entemedió y menazó con represalies -les que taben na so mano- si Tenneco nun rectificaba la so decisión y camentaba meyor lo que diba a facer. Tenneco, de mala gana, rectificó dando marcha atrás, anque yá tien dicho que como aína nun apaeza dalgún comprador pa la empresa, ella nun va a volver a facese cargu de la mesma. Damocles y la espada.
Por facer bien el so trabayu, Tajani merez la nuestra felicitación, la de los trabayadores de la empresa y la de tolos asturianos que, anque seya de momentu, caltenemos una fonte más de recursos pa un País que tan necesitáu ta d’ellos. Y esa felicitación que facemos amuesa qu’eso nun suel ser lo normal. Quiero dicir y digo, que si hai que felicitar a dalguién por cumplir col so deber, ye que davezu esi deber nun se cumple. O dicho d’otru mou, que los comisarios europeos y demás funcionarios de Bruseles nun realicen el llabor pal que fueron escoyíos. Esi ye’l principal motivu d’eso que llamen «la desafección» de los ciudadanos coles instituciones europées. Que piensen -pensamos- que nel fondu nun sirven más que pa echate bronques o castigate por que faes mal les coses: draconianes reformes llaborales, deudes escesives qu’hai que pagar pernriba otros condicionantes sociales, reflotaciones d’entidaes bancaries que llueu pagamos los currantes… Pa eso ye pa lo que pensamos que val la Comunidá Europea, y por ello, cuando en dalgún casu aislláu el resultáu beneficia a un pequeñu coleutivu de trabayadores, entamamos una verbena con «traca» incluyía.
Y esa verbena con «traca» ye poner el nome d’una cai al comisariu, regala-y una semeya de los trabayadores formaos como un equipu futbol, entrega-y una camiseta del Sporting, llevalu al Molinón a conocer a Quini, conducilu a saludar a la estatua de Octavio Augusto nel Campu Valdés (que pa eso Tajani ye italianu), recibilu na Casa Conceyu con tolos honores y too ello con presencia de tola clas política asturiana que, a esti tipu de coses, apúntase que se mata. A cambiu d’ello, don Antonio Tajani dio nel clavu diciendo dos coses que nos encanten a los xixoneses y a los asturianos. La primera qu’Asturies ye España y el restu tierra conquistada (según ponía «El Comercio»), y la segunda que’l Sporting, dientro de dos años, diba a xugar la Champions League. Creo que meyor nun se pue conocer la idiosincrasia d’un pueblu.
Asina que toos contentos: Tajani marchó encantáu, pensando en presentase a Presidente de la República Italiana, y los asturianos cola satisfaición del deber cumplíu. De bien ñacíos ye ser agradecíos y, amás, esi Tajani ye «un paisano».
