Fue bastante vergoñosa la retransmisión televisiva del actu del Campoamor (la verdá ye que nun la vi entera), pol escaezu que se fizo de les protestes que s’aldovinaben alló, nel fondu del paisaxe uvieín. Ye nidio que nun diben a da-y muncha cobertura, pero ente eso y escaecelo dafechu debiere haber un intermediu. Nun voi falar de les llamaes «marches de la dignidá», nin de los actos de la izquierda plural, con una mecigaya incomprensible na que diben de la mano un Partido de los Trabajadores Andaluces, con xente d’Amaiur, que al mio modestu talantar tienen discursos, nun ya diferentes, sinón incompatibles, pero bueno, digo que nun voi falar de too ello porque abúltame que yá tien los sos propios medios de ruxilo y yá tocó n’otros momentos. Lo que quiero dicir, y digo, ye que podrán ponese tolos reparos que se quixeren a estos premios -yo mesmu tengo dalgunos que poner- pero mirándolo ensin pasión tamién tienen un llau positivu que nun convien desdexar.
Lo primero, qu’hai un piñu de persones interesantes, de xente que tien un mensaxe intelectual y una postura ética que tresmitir y que munches veces la defensa d’esa postura pue costa-yos muncho, inclusive la vida como ye’l casu de dalguna de les premiaes esti añu. Ye verdá que tamién hubo munchu «mexanís» premiáu, como’l casu del «nuestru» Fernando Alonso» o d terminaos futboleros, por nun dir más lloñe, pero lo uno nun quita a l’otro. Asina que, como tenía munchu trabayu de plancha atrasáu, mangué la tabla frente a la tele pa sentir dellos de los discursos de los premiaos. Por un fallu nel cronometraxe, namás pude facelo, un cachín con John Banville y la so encesa defensa del llabor del escritor a lo llargo la historia -«afilamos nuestras frases para que alcancen el corazón de las cosas»- y llueu sí, con Joseph Pérez y con Caddy Adzuba (creo que lo pongo bien).
Pérez tuvo méritu porque, en llugar d’escoyer un tema tan queríu pa elli como ye’l de Carlos I y el so Imperiu nel que nun se ponía’l sol, escoyó un humilde testu de Fray Luis de León nel que se falaba de la paz. Con dos pallabres que podíen prestase a enquivocos -«orden y sosiego»- pero qu’él desplicó con claridá pa llegar a la conclusión de que, cuando un sistema nun ye aceptáu pola totalidá de los que lu comparten hai que lu cambiar por otru. Y qu’hai que lluchar siempres escontra la inxusticia. Esto, claro, dicho con pallabres míes. Nun fizo mención, nin una sola vez, a la Corona. Y llueu intervino la periodista congoleña Adzuba que dio una verdadera lleición de dignidá, denunciando los cientos de miles de violaciones, la crueldá d’una guerra sofitada poles grandes multinacionales, los neños que lleven pa combatir y eses probes families qu’anden d’un llugar a otru ensin comida, nin abellugu. Fizo enmudecer al auditoriu col so calofriante rellatu d’una guerra que paez nun interesar a naide. Pa finar pidió la constitución d’un Tribunal Penal Internacional específicu pal Congo, como se fizo con Ruanda, ya que l’otru ye claro que nun funciona. Aprovechó, entós, la plataforma de los premios p’alzar la so voz, con resonancia mundial, lo cual yá ye una pequeña xustificación de les que yo falaba más enriba. Depués vi que xubía’l Borbón a garrar el micrófonu, y como ya conozo toles mandangues que cuenta cada añu, treslladé la tabla de planchar pa la cocina y punxe’l programa»El sótano» de Radio Tres. Casualmente taba cantando Louis Armstrong un blues que se titulaba dalgo asina como: «Mueve tu la boca, que yo movere’l mio negociu». Paez que taba viendo tamién lo del Campoamor.
