close
Tán buenos pa callar

Tán buenos pa callar

El Presidente de la Patronal Asturiana, señor Feito, apuntóse tamién al carru desprestixador de la llingua de los asturianos faciendo les voces orquestales a Mercedes Fernández, la eterna perdedora, y a esi “Ciudadano Prendes”, remedu del xenial Peter Sellers faciendo de “Mister Chance”. Paez ser que pa que la nuestra llingua tenga viabilidá nel futuru, nun desapaeza, y con ella tou un mundu que se describe coles sos pallabres, hai que “detraer” perres d’otres coses y eso nun sería bueno. O nun sería posible. O nun sería…

Yo nun sé cómo se financien notres comunidaes les sos llingües propies, nin cómo se financia la llingua castellana -esos Institutuos Cervantes pol mundu tienen de costar un reñón- pero muncho me temo que les perres salgan d’onde sal too: del bolsu de tolos españoles, de los nuestros impuestos, autonómicos y estatales, que pa los dos pagamos, ensin cuntar los municipales que cuido dirán pa otres coses. Por tanto, nosotros nun queremos ser distintos, nin pidir coses estravagantes, namás pidimos ser trataos como los demás. ¿Ónde ta’l problema? ¿Pueden los gallegos financiar la so llingua? Xenial, nosotros tamién podemos. Y pongo los gallegos porque son una comunidá probe, como la nuestra más o menos. Repito, ¿por qué nosotros tenemos problemes y ellos non?

Pero llueu hai otres coses. Fálase de les subvenciones a la llingua asturiana. Ente paréntesis, una miseria. Bien, eso dícenlo dende partíos políticos como’l PP y Ciudadanos. Les subvenciones. Oigan, doña Mercedes y don Prendes, ¿y les subvenciones a los partíos políticos por parte del Estáu, de lo que tán viviendo toos ustedes? ¿Por qué tengo que pagar yo, colos mios impuestos, subvenciones que van a parar al PP, a Ciudadanos o cualquier otru partíu? ¡Que se financien coles cuotes de los sos afiliaos! Y nun digamos yá con toles trampes de les campañes ellectorales en dalgunos partíos de toos conocíos, que se subvencionen con dineru negru y Caxes B, a cambiu de prebendes nes contrataciones. Pues por ello tán atascándonos la xudicatura, que nun da abastu a tantu xuiciu “choriceru”. Asina que nun me falen de les subvenciones que yo toi pagando a dos manes pa coses que, nun ye que nun m’interesen, ye que me fieden. En resumiendo:

“1. El castellano es la lengua española oficial del Estado. Todos los españoles tienen el deber de conocerla y el derecho a usarla.2. Las demás lenguas españolas serán también oficiales en las respectivas Comunidades Autónomas de acuerdo con sus Estatutos.” Esto diz l’Artículu 3 de la sacrosanta Constitución Española. ¿Qué parte ye la que nun s’entiende, ho? Pues eso, nun me vengan con histories que la cosa ta mui clara, partíos “constitucionalistes”…