La Conseyera d’Educación, Cultura y delles coses más, del Gobiernu del Principáu, nun ye una persona que me caiga mal. Más bien a la escontra. Paezme una persona decidida y que nun tien pelos na llingua (habrá que buscar otros llugares comunes, a fin de cuentes naide tien pelos na llingua). Y el nomamientu pal cargu de responsable de Política Llingüística, na persona d’Ana Fueyo, abúltame que fue un aciertu grande. Namás coincidí con ella una vez, nun actu nel Colexu de Tremañes en que se festexaben los 25 años del so nacimientu (el del colexu, non el de la Conseyera) al que m’invitaron como familia de María Teresa González a la que, xunto a otros vecinos del barriu, se-y facía un homenax. Cola intervención de los neños, aquello fue un poco marabayu y a la hora d’entregar un recuerdu a caún, nun se sabía mui bien quién lu recoyía, asina qu’ella (agora si, la Conseyera), entregóme una mazana metálica con una plaquina, ensin saber mui bien quién yera yo. Yo sí sabía quién yera ella. Por cierto, faló a los neños con muncha gracia.
Too esto nun vien al casu y nun sé por qué diaños lo cuento, pero creo que yera pa dicir que, pese a que nun me cai mal, nun tengo más aquello con ella. El casu ye que, de magar unes declaraciones suyes que recueye la prensa, voi tener que revisar les mios opiniones. Porque a los que naguamos, dende va munchos años (¡una eternidá!) pola Oficialidá del asturianu, yá se nos dixeron munches coses, se nos punxeron muches torgues y se nos pidieron munches condiciones. Nun voi a retafilales agora. Pero lo que nunca nun se nos pidió, pa conseguir que la nuestra llingua fuere oficial, yera «la unanimidá» de la sociedá asturiana a la hora de pidilo. ¿Usté sabe lo que diz, señora Conseyera? ¿Cómo que la unanimidá? ¿Entenderíalo yo mal, ho? Unanimidad: Sin discrepancia, de manera unánime. Unánime: Dicho de un conjunto de personas: que convienen en un mismo parecer, dictamen, voluntad o sentimiento. (RAE. dixit)
¿Quier esto dicir que, si tola sociedá asturiana tuviere apautada en facer oficial a la llingua asturiana, y hubiera un
paisanín en Cabañaquinta (por poner un exemplu) que nun tuviere d’alcuerdu, nun se podría facer porque nun hai unanimidá? Bono, pues si ye eso lo que quixo dicir, amiga mía, dende agora rompemos les supuestes amistaes, porque nunca nun vi una babayada mayor, nin una forma más grosera de dicir que la Llingua Asturiana NUNCA VA A SER OFICIAL PORQUE NUN NOS DA LA GANA, A NOSOTROS, QUE SOMOS LOS QUE MANDAMOS. Eso ye en definitiva lo que suponen eses declaraciones. Y ye que nin en Cataluña, nin nel País Vascu, nin en Galicia, nin nel restu d’España hai unanimidá, non ya pal tema de la llingua, sinón pa nengún otru tema que se quiera proponer. Namás naquella Rumanía de los Ceaucescu, o en republiques o monarquíes «bananeres», delles veces los alcuerdos averábense a la unanimidá, porque igual había un que yera sordu o nun s’enteraba bien y votaba’l revés. ¿Y quier usté, señora Conseyera, que’l pueblu asturianu tenga que decidir l’algame d’un derechu cívicu, que nun obliga a naide a utilizalu y que nos caltién nun grau d’infantilismu o minoría d’edá respeutu a otres comunidaes d’esto que se llama España, POR UNANIMIDÁ…?
Bien, anque sé qu’esti blogue lu llee muncha xente (na parte abaxo figura’l númberu de curiosos qu’entra ca día) imaxino que usté nun ye una d’ellos. Pero si por un casu lu fuera, pído-y por esi recuerdu que me dio en Tremañes, ensin saber quién yera, que recapacite y que se desdiga de lo dicho. Y que nos ufierte a los parias, un «baremu» un poco menos imposible de cumplir. Fálenos de porcentaxes: ¿qué porcentaxe d’asturianos tenemos que pidir la oficialidá? ¿El 30, el 40, el 80…? Porque igual nel futuru somos a comencer a un grupu grande d’asturianos qu’axude a salvar la llingua asturiana, pero con eso de la unanimidá, la verdá ye que nos lo pon mui difícil, señora Conseyera. Nin pidiéndolo a los Reis Magos. Que tenga unes felices navidaes.
