Hai momentos na Historia en que paez que les coses van despacio, que malpenes se producen cambeos y que too asemeya tar parao. Como si’l tiempu se detuviere. Y hai otros en que les coses embálense, apresúrense y esos cambeos que non se producíen agora fluyen como riega en dexelu. Tal paez que la Historia funcionare a saltos, en vez de como una llinia continua que s’espurriere p’alantre. Asina, depués de meses (cuasi años) de vivir como «el día la marmota», coles mesmes posiciones polítiques y ensin llograr formar un gobiernu, estes caberes eleiciones embalagaron los acontecimientos llogrando, que’l cabezaleru y fundador de Ciudadanos colara pa casa, y que los dos partíos estatales d’izquierdes se punxeren d’alcuerdu pa formar un gobiernu de coalición.
Como la cosa ta tovía nel aire, y abúltame que les coses van siguir embalándose, nun m’atrevo a facer de pitonisu. Paez qu’esta vuelta sí va a poder llograse un gobiernu pa los prósimos cuatro años, pero entá falten bastantes flecos por amarrar. A ver. Lo que sí podemos ye, con tola prudencia del mundu, comentar dalgo del resultáu d’estes últimes (pol momentu) eleiciones. Muncha xente diz qu’esta convocatoria fue una perda de tiempu y de perres, y yo creo que nun ye asina. Enantes d’ella la cosa nun taba madura y los tiempos políticos van per otru llau distintu a los nuestros tiempos. El PSOE camentaba que con nueves eleiciones podía acercase más a la mayoría absoluta y, anque nun la sacare, tar nuna posición de mayor fuerza que la que tenía. Quería llegar a alcuerdos, paezme, pero tampoco nun-y importaba muncho dir a nueves eleiciones. Y Podemos quería tirar de la cuerda hasta onde pudiere pa sacar alantre lo del gobiernu de coalición, que daría sentíu a los problemes internos (y esternos) que tenía. La cuerda tarazóse y tuvieron que dir a eleiciones, Y ye agora, cuando dambos partíos fracasaron en parte, cuando se ven obligaos a facer lo qu’enantes nun pudieron o quixeron. Nun-yos quedaba otru remediu, d’ehí lo rápido que s’apautaron. Poro, nun val dicir que fue una perda de tiempu, sinón una especie de «maduración», d’atropar los restos del naufraxu y con ellos facer una llancha salvavides. Que con ella puedan llegar a puertu ye dalgo que ta por ver, pero esta vuelta l’intentu va en serio. Y una cosina más. Munchos intelectuales d’izquierdes aseguraben que Podemos, y más en concreto Pablo Iglesias, nunca diben a entrar nun gobiernu del PSOE, porque la Banca, y les grandes empreses del Ibex nun lo consentiríen. Prestaríame qu’agora rectificaren y dixeren que taben enquivocaos, que si nun entraron va unos meses nun fue por eso, sinón por otros intereses eleutorales del señor Pedro Sánchez. Podrá tar enquivocáu, pero colos sos propios erros. Polo demás, siguimos sollertes a lo que pase.
Semeya: Andrea Comas (El País)
