close
Toos inxenieros

Toos inxenieros

2015-10-17501Visitas

Universidad-de-OviedoYe una noticia vieya d’un periódicu, que tenía marcando un llibru. Nella dizse que Podemos, d’alcuerdu col Conseyu d’Estudiantes de la Universidá d’Uviéu, pedirá que s’anulen toles espulsiones del cursu pasáu, de resultes de l’aplicación del Réxime de Permanencia agora en vigor. Quieren cambialu porque, según dicen no es eficiente y no promueve el derecho a una educación pública. Y añade Podemos -el señor Ripa- que vamos a poner todos los medios para que no haya expulsiones de estudiantes (…) y que en caso de expulsión, se permita la rematriculación dos años después.

Cuando yo estudiaba na Universidá de Bilbao, allá pol Paleolíticu superior, la propaganda y la llucha que teníemos entamada -una de les munches- yera porque namás un 1% de los alumnos matriculaos procedía de la clas obrera. Descomanáu porcentaxe y descomanada inxusticia, al tiempu qu’un mal pal país pues seguro que, de toos aquellos fíos d’obreros que nun podíen estudiar munchos podríen ser, por capacidá, unos grandes inxenieros, economistes o abogaos. Aquello, pasu ente pasu, cambió, y yá a la muerte del Dictador los rapazos que veníen d’esi estratu social fueron aumentando. Dende va munchu tiempu, esi problema nun esiste gracies a beques, axudes y al aumentu del nivel de vida xeneral. Ye cierto que cola crisis l’esfuerzu económicu de les familes engrandó y el retrocesu ye claru, pero nun tien res que ver colo que yo comentaba enantes.

Pero -y agora vuelvo a la noticia- una cosa ye que toles persones tengan derechu a la educación y otra ye que toos tengan derechu a ser inxenieros. N’efeutu, naide debiere quedar ensin la oportunidá de poder estudiar una carrera, pero tampoco toos están capacitaos pa facelo. Esa opinión de que la Universidá nun pue despedir a los alumnos que nun algamen unos mínimos, ye una barbaridá. La Universidá cuesta muncho a tolos españoles, que pagamos colos nuestros impuestos porque les tases universitaries nun lleguen pa ello. Y ye inconcebible qu’haya alumnos que por falta de capacidá, o d’interés anden vexetando años y paños peles aules gastando unes perres que faen muncha falta pa otres coses. Nun digo que nun haya dalgún alumnu con un motivu concretu dignu d’estudiu, col que se pudiere facer una esceición, pero esa filosofía de que tol mundu que lo quiera tien que llegar a ser Inxenieru o Economista ye un absurdu y nada tien que ver con un reclamáu «derechu a la educación». Una cosa ye que, nos niveles anteriores a la Universidá, la educación seya obligatoria y gratuita, pa que tolos neños/es tengan argumentos pa desenvolvese na vida, pero otra cosa ye -al mio modestu talantar- que nun toos valen (valemos) p’algamar cualquier títulu. Yo nun podría ser Inxenieru na vida, y sería una perda de tiempu y de perres que tuviere cursos y cursos na Escuela ensin que me declararen incompatible cola carrera. A otru nivel, ye lo mesmo qu’esa famosa fras de que «toles opiniones son respetables». ¡Oiga, non! Una cosa ye que toos podamos emitir una opinión, y otra distinta que toes seyan respetables. Dalgunes nun lo son n’absoluto. Toos debemos tener la posibilidá d’estudiar, pero sólo los que valgan pa ello deben algamar el títulu. ¿Que se pue meyorar esi Réxime de Permanencia? Mui bien, que se faiga. Pero lo que nun pue iguase democraticamente ye que toos seyamos igual de llistos. Eso ye cosa de la madre Natura.