close
Tottenham nun ye sólo un equipu de fútbol

Tottenham nun ye sólo un equipu de fútbol

2011-08-11Tottenham346Visitas

Pa los que somos futboleros, el nome de Tottenham vien siempre xuníu al equipu londinense que xuega na «Premier League». Un equipu que conoció tiempos meyores, y qu’agora traten de reverdecer. Pero l’españíu de violencia de los caberos díes vien a confirmanos qu’esi barriu de Londres ye dalgo más qu’un equipu de fútbol. La muerte d’un rapaz por un disparu de la policía (¡hai d’aquellos años nos que los «bobbies» diben desarmaos!) fue la mecha que prendió la foguera en qu’aquello se convirtió. Nun ye, como nel casu d’España, la «revolución» (pacífica) de los indignaos. Ye la rempuesta descomanada y violenta a una situación de inxusticia social, miseria (material y moral) y hacinamientu. Gran Bretaña ye, según les estadístiques europées, un de los paises nos que mayores diferencies sociales esisten. violencia-en-londresTottenham ye un barriu onde nun se sabe cuántes etnies viven, cauna cola so propia llingua, vezos y… miseries. La droga, la marxinación y la violencia abeyen perellí diariamente, pero hasta agora la cosa taba controlada. Y mentantu la cosa tea controlada… pa qué solucionar temes que nun son prioritarios. Pero les coses que nun se controlen, finen por descontrolase. Y cuando eso asocede ye talo qu’un tsunami que s’espurre d’unos llaos a otros.

Hai que condenar, ensin disculpes, la forma en que s’asoleya esi descontentu. Una forma d’una violencia inxustificable que, amás, perxudica mayormente a los pequeños comerciantes, y a aquellos convecinos que tamién sufren unes condiciones llamentables. Pero dicho eso, hai que condenar tamién la situación a la que munchísima xente se ve empobinada nes modernes sociedaes capitalistes. Va pocu tiempu, dalgo asemeyao asocedió nos barrios de París. Y ye que’l capitalismu selvaxe emburria a la xente a la llei de la selva. Que nun vengan llueu llamentándose per unos fechos qu’ellos mesmos provoquen. Hai qu’aparar la violencia. Pero les soluciones nun son solamente d’orde públicu. Una cosa más: cargar les culpes contra les «redes sociales», por ser el mediu en que se convoquen les revueltes, ye d’un infantilismu que manca. Culpar al mediu ye un recursu mui fácil. Cuando’l capitalismu empezaba, les güelgues convocábense con «pasquines» o panfletos. Internet fai la mesma función, pero multiplicada. Por cierto, tamién lo crearon ellos.