Cúmplese un añu dende la proclamación de Felipe VI como Rei d’España. Socedió a so padre, como suel pasar nestos casos, qu’abdicó dempués d’algamar unes cifres de descréitu másimes nos cuasi cuarenta años del so reináu. Ye lo que tien la monarquía, nun faen falta eleiciones, nin urnes, nin campañes, nin día de reflexón. Pasa d’un a otru «pola gracia de Dios».
Empondérase al retoñu de Juan Carlos I pola so prudencia. ¡Qué menos! Namás faltaría que tamién fuere a cazar elefantes a África, como papi. A Juan Carlos, cuando lu nomaron, pocos lu conocíen. Tuvo tola so mocedá a la solombra del dictador y xubió al tronu tres xurar los Principios Xenerales del Movimientu y acatar les sos lleis represores. Ye lo que tocaba, claro. Pero nun yera un bon «curriculum». A ésti conocémoslu dende guah.e, onde vieno añu tres añu a entregar unos premios que lleven el nome d’Asturies, pero que nunca apaeció nos solemnes actos, más que pa enllenase lo boca con tópicos al rodiu de la so xente y el so carauter. Babayaes que se dicen auquiera que se vaya.
El problema, a la fin, nun ye qu’un rei caiga meyor o peor qu’otru, el problema ye la propia monarquía. Una
institución vieya, cadúca, ensin sentíu nuna sociedá moderna que yá nun necesita d’esi «arbitriu» que dicen que representen los reis, lloñe yá d’aquellos otros qu’imponíen la so santa voluntá al pueblu sobre’l que mandaben. El neñu, o seya, el pueblu, yá medró y aprendió a caminar ensin muletes, y lo que correspuende ye guardales nun caxón y pesllales con llave. Como recuerdu d’otros (malos) tiempos. Asina que si Felipe VI quier ser, amás de simpáticu o prudente, un bon rei, lo que-y correspuendería sería convocar un referendum sobre qué forma quier el pueblu español pa organizar la so convivencia política. Mentanto, verémoslu (o polo menos verélu yo) como un esllabón más dientro una cadena que, a nun ser mui cuntaes esceiciones, afogó al pueblu y lu llevó, como diría l’otru, a les más altes cimes de miseria social y política. Siéntolo, nun puedo felicitalu pol so aniversariu.
