Como dicen que’l que muncho fala muncho s’enquivoca, esta vuelta nun voi llanzar les campanes al vuelu. Dígolo pol nomamientu de Xenaro Alonso Mejido como nuevu Conseyeru d’Educación y Cultura. Y ye qu’alcuérdome de cuando nel gobiernu del ínclitu Cascos «el breve», punxeron nesi cargu a Emilio Marcos Vallaure, y titulé un d’estos articulinos dalgo asina como «un de los nuestros». Llueu resultó que como’l del chiste, nun yera del mesmu Bilbao.
Poro, nun quiero cayer nel mesmu erru y volver a dicir lo mesmo, pero’l principiu qu’acompaña a Xenaro abúltame que ye bien bonu: la solicitú de la especialidá del Asturianu y Gallego-Asturianu, na primera xunta que tuvo col Ministru d’Educación, el sostitutu de Wert I, «l’ineptu». Too bien desplicadino negro sobre blanco nun papel, porque les pallabres llévales el vientu.
Conozo a Xenaro col que siempre caltuve mui bon tratu. Cierto ye que nun puedo falar d’amistá, pesie a que dambos coincidimos en xuntes de l’Academia -ye miembru de númberu- anque él, por motivos profesionales, nun fue muncho perellí. Siempre lu tuvi por un rapaz seriu -no que fai, non nel xeitu que lu tien bien agradable- trabayador ya informáu. Y mui enfotáu en tolo que cinca al nuestru País y a la so cultura. Poro, les blimes pa facer el cestu tán ehí preparaes. Agora sólo falta que lu dexen trabayar y que tenga aciertu no que faiga. Ta claro qu’él nun pue trayenos la Oficialidá, o seya que nun voi a pidí-yla. Namás-y deseo suerte y que’l camín que percorra dende esi importante cargu, frutie abondo en porgüeyu de los sos compatriotes y d’él mésmu. Que seya asina.
