Paez que dixo Confucio que la metada del cielu yeren muyeres, pero vete tú a saber. Y tamién con esi títulu fizo una película -mui interesante- el direutor Manuel Gutiérrez Aragón. Siento falar al mediudía pola SER a la Conseyera de Cultura del Principáu afirmando, mui encesamente, qu’una cuarta parte de los asturianos, o seya, doscientos cincuenta mil (póngolo con númberos pa que se vea meyor: 250.000) utilicen la llingua asturiana como llingua vehicular. Y por si nun lo entiendéremos, desplícalo. Quier dicir qu’empleguen l’asturianu pa espresase normalmente na vida diaria. Y nun contenta con eso, defende tamién encesamente (pol tonu) que seyan el cien por cien los asturianos que lo faigan. Asina -digo yo de la mio collecha- que si hubiere un cielu sólo pa los asturianos (ellos y elles), un cuartu d’esi cielu ocuparíamoslu los que falamos n’asturianu. Bueno, igual munchos de nós díbemos pal infiernu, pero esi ye otru cantar.
Hai un par de coses curioses alrodiu d’esta constatación que fizo la Conseyera, supongo qu’ensin que naide-y punxere una pistola en pechu. La primera ye que, diciendo esto na presentación de la Selmana de les Lletres, nun lo ficiere emplegando esa llingua de la que paez presumir. ¿O ye qu’ella nun quier ocupar un sitiu dientro del nuestru cachu del cielu? En cualquier casu, y anque asina fuere, ¿nun paez que sería normal que, delantre un eventu que trata d’ensalzar a les nuestres lletres, ficiéralo n’asturianu? Nun hai que ser Premiu Nobel pa ello.
La segunda cosa curiosa ye que, por primer vegada, les autoridaes oficiales «reconocen» un númberu tan grande de
falantes de la llingua. Siempre se refieren a «los del bable» como si fuéremos cuatro «mataos» que tamos perehí dando la vara. Un grupúsculu d’axitadores que, en llinguax franquista, «a nada ni a nadie representan». Pero resulta qu’agora los «mataos» somos una cuarta parte del total de los asturianos. Bien ta reconocelo. Y más, añadiendo que la fin ye que toos y toes lo seamos.
Y la última cosa que se m’ocurre alrodiu de les declaraciones de la señora González, doña Ana, ye que con esti reconocimientu esplícitu ¿cómo se pue nun declarar OFICIAL a la llingua propia, qu’empleguen a diario un cuartu de millón d’asturianos? ¿Nun ye eso un atentáu gordu escontra los sos drechos? Quede claro que atentáu, lo que se diz atentáu escontra los drechos sería igual fueren 250.000 o sólo 250, pero ye qu’agora la cifra «suena» a tan importante que l’agraviu paez entá mayor. Asina qu’habría qu’entruga-y a la señora Conseyera: «¿Y va a facer usté dalgo pa enmendar esa inxusticia o vamos quedar na marxinalidá xurídica una cuarta parte de los sos compatriotes? A ver si contesta dalgo. Anque seya en castellán.
