Nun quiero tratar equí del obligáu exerciciu físicu depués de les fartures navidiegues, que nos punxeron, pese a la crisis, un par de «michelinos» más na centura. Refiérome a otru exerciciu que considero moralmente mui sanu: la imputación de la Infanta Cristina polos sos chanchullos, a medies col Duque de «Príapo». Y digo que ye moralmente mui sanu, al marxe de la presunta inocencia de la doña, porque asoleya qu’eso de que naide ta penriba de la llei nun son sólo pallabres pa un discursu de Nuechebona.
Y ye que’l sufríu pueblu español, esi españolín de corices o alpargates, vivió siempre embaxo la bota de los poderosos: esos Reis absolutistes que lu masacraron o esi Xeneralón que los aforfugó. Esos Austries o esos Borbones que-y punxeron el pie nel pescuezu y lu mantuvieron siempre como siervu, y nos meyores casos como súbditu, pero nunca como ciudadanu. El fechu de ver agora a una fía del Borbón llamada a declarar delantre un xuez, ye un exerciciu sanísimu pa que’l pueblu español (y equí nun estremo ente naciones) recupere, o meyor, acceda, a la so soberanía como tal. Eso que siempre se diz pero que nun ye verdá, de que la soberanía del Estáu reside nel pueblu. Yo nunca nun lo sentí como cierto. Agora toi principiando a creyelo.
Nun entro equí, porque nun lo sé, si hai razones xurídiques o non pa imputar a la muyer del Príapo, pero a tenor de los 
que salen na so defensa abúltame que tien d’habeles: l’ABC, La Razón, un acusador (fiscal) travestíu n’abogáu defensor… En cualquier casu, si doña Cristina ye inocente nada tien que temer, pa eso la llamen, pa que desplique los sos argumentos. Si yo tuviere nel so casu taría encantáu de poder demostrar la mio inocencia cuanto enantes. Lo raro ye que nun fuere ella personalmente la que pidiere, yá dende l’aniciu, poder declarar delantre’l xuez pa dar la so opinión. D’esi mou tuviere pasao d’imputada, como agora, a testigu deseosa d’esclariar los puercos asuntos del so maríu. Pero’l tener que llevala un poco «a rastres» nun me da mui bona espina.
Esperemos a ver qué pasa, porque yá sabemos que nesti país, o lo que seya, les fuerces retrógrades siguen ehí vives y espatuxando. La campaña de desprestixu del xuez Castro, como primero pasó con Garzón, ya principió a furrular. Y esos nun se paren ante nada, personal o profesional, verdadero o falso, colo que muncho me temo que la Borbona nun llegará a calentar el bancu. En fin, n’Inglaterra cortáron-y el pescuezu a un Rei, y en Francia idem de lienzu. Per unos momentos el pueblu sintióse soberanu. Equí yo conformaríame con que la fía d’otru Rei se sentare nel banquín. Ensin revanchismu, sólo pa poder sentir, per unos momentos, esa soberanía del pueblu que diz la Constitución.
