Comentaba l’otru día nuna d’estes “epístoles morales a Fabio” la mio extrañeza por ser Asturias la única de les comunidaes del Estáu Español ensin un partíu rexonalista dientro l’espaciu políticu. Quiero dicir, claro, con responsabilidaes institucionales.
Un fiel seguidor d’esti “tabloide” escríbeme pa dicime que, entós, si non cubre esi campu’l partíu d’Álvarez Cascos, Foro. La verdá, nun se m’ocurrió qu’asina fuera. Porque, n’efeutu, Foro ñació como una resquiebra del PP asturianu cola pretensión d’asitiase nesi llugar que, n’otros llaos, ocupen los partios rexonalistes de dereches. Una especie de PNV a l’asturiana, o más probemente, del Partíu Cántabru o Aragonés. De fechu, dellos militantes de la primer fornada paecíen tener un pasáu asturianista. Pero’l casu ye que, pasáu’l tiempo, hai que dicir que Foro tien tanto de rexonalista como UPyD, o seya, nada.
Yá comenté n’otra ocasión que don Francisco Álvarez Cascos tien el murniu honor de ser l’unicu Presidente del Principáu que nun quixo recibir a l’Academia de la Llingua Asturiana. Meses tuvo pa ello y non lo fizo. Y, por nun cansar a los llectores, Foro tien tamién el murniu honor de votar pa que l’asturianu desapaeza. Nun sé cómo lo llamarán ellos, pero que quieran que la nuestra probe, maltratada y marxinada llingua compita con una segunda, o tercera llingua estranxera nos curriculums escolares ye, amás d’incumplir la Llei d’Usu, un pasaporte pal esaniciu. Nun m’estraña de UPyD, que ta claro que quier acabar coles autonomías, nin d’un PP enlloquecíu que va derechu –polo menos en Xixón- a l’autodestruición, pero sí d’un partíu que cunta nes sos files con xente que dalgún día dixo ser asturianista.
Caún milita o dexa de militar n’onde-y da la real gana. Pero tien de llevase mui mal el presuntu amor a Asturies cola militancia nun partíu que col so votu pue unviar al limbo a un de los sos bienes más valibles: la llingua.
