Falé l’otru día, con motivu del so fallecimientu, del escritor y Premiu Nobel de Lliteratura irlandés Seamus Heaney. Y vuelvo a falar (escribir, ya sé) güei a cuenta del Homenaxe que, por parte la organización de l’Arribada, se-y ufiertó esti vienres 27 nel Patiu del Antiguu Institutu Xovellanos. Pocos casos hai más merecíos pa homenaxear a naide qu’ésti. Porque, como tengo dicho, l’escritor irlandés fue dende siempres un fondu defensor de la llingua de los asturianos, al par de defender, llóxicamente, al so gaélicu. Y pa ello, aprovechó delles estancies nel nuestru País pa, delantre les propies cobardes autoridaes asturianes, que refuguen el tema, pidir la oficialidá de la nuestra llingua. ¡Qué llástima que tengan que venir los de fuera a dar exemplu d’asturianía y de bonhomía a los nuestros gobernantes, y esta vuelta na menos qu’un Premiu Nobel!
Nel actu hubo muncha xente, lo cuál me prestó abondo pues nun suel ser normal tal asistencia a les nuestres coses. A ver si vamos aprendiendo a valorales, y nun sólo de pallabra. Hubo una llectura de poemes n’asturianu, castellán ya inglés. Sentí llegar col tiempu un poco xustu y perdeme la llectura de Xuan Xosé Sánchez Vicente, un de los meyores llectores de poesía que tenemos. Pero sí llegué a tiempu pa oyer a Miguel Rojo facelo perbién. Depués David Rivas, siempre con «pose» interesante. Aurora García Rivas, esta vez en castellán, y Carmen Ruedas, a la que nun conocía y que lleó nun perfeutu inglés que nun fui a saborgar porque lu falo peor qu’Aznar… Capítulu aparte pa Xuan Santori que, como traductor qu’acompañó a Heaney na so revolada per Asturies, cuntó unes cuantes anéudotes mui simpátiques y lleó dalgunos cachos del discursu del escritor irlandés, por cierto de munchu interés. Y xunto a toos ellos, Mento Hevia que, pa min, fue un de los trunfadores de la tarde, acompañando les llectures con unos sones de «raviola astúrica» mui afayaízos, ya interviniendo en solitario con una pieza irlandesa y otra asturiana que produxeron una gran y merecida ovación. Al final fui a felicitalu. Zarró l’actu la Coral Asturiana de Xixón, que nun ye la Polifónica pero que cantó con puxu unes guapes canciones populares asturianes. En fin, un actu mui variáu y prestosu que, toi seguru que de poder velu don Seamus, quedare encantáu. Y toi por apostar que, cola humildá que lu calterizaba, diría dalgo como: «¿Pero too esto ye pa min?». Como otros…
