Los socios d’ Anxelina la «ferruñosa» (la dama de fierro alemana), unos que son «bávaros», y tamién «bárbaros», acaben d’inventar un orixinal y novedosu sistema pa finar col paru. O polo menos con parte d’él. La cosa va de contratar a un funcionariu públicu pa cada vivienda d’inmigrantes, cola misión de controlar que, na intimidá del llar, falen tamién alemán. Dase por supuesto que de puertes afuera tienen que lo facer, porque sinón nin alcuentren trabayu nin papelos, pero eso solo nun tendría mayor gracia. Los simpático y -repito- orixinal, ye que’l funcionariu controle que, si un búlgaru, por poner un exemplu cualquiera, ta sentáu na taza del váter y necesita papel, que-y lo pida a la muyer o al fíu mayor na perguapa y cantarina llingua de Friedrich Nietzsche. Pa ello ye necesaria la presencia «in situ» d’un funcionariu del gobiernu, meyor si pudiere ser un notariu, anque nun hai tantos nes llistes del paru alemán, pa que llevante acta de la correición o, nel so casu, incorreición, del llinguaxe emplegáu pol inmigrante en cuestión. Ta claro que falamos de munchos inmigrantes y, poro, de munchos nuevos puestos funcionariales pa lo qu’habríen convocase amplies oposiciones. Lo que nun se sabe a estes altures (polo menos nun lo sé yo) ye si el tal funcionariu trabayaría a plena lluz del día, ye dicir, compartiendo mesa y comida, y a lo meyor cama, colos residentes foriatos, o por contra, taría escondíu detrás de les cortines o dientro dalgún armariu. Nesti segundu casu, claro, deberíen habilitase unos pluses de pelligrosidá o, polo meno, insalubridá polo delicao del llabor. Taremos sollertes a les últimes noticies bávares, anque la decisión final tará en manes d’Anxelina la «ferruñosa» que, anque nun ta mui pol llabor, valora enforma la so coalición con una xente que tien tantes y tan bones ocurrencies. Siguiremos informando.
