Lleo estos díes en periódicos de papel y dixitales, que’l presupuestu autonómicu pal añu prósimu, el que s’apreba nel Parllamentín asturianu, recorta toles subvenciones rellacionaes cola llingua, esceuto la de l’Academia que medra. Nun m’estraña que con tantu ruxe-rux y cambeos de gobiernu la xente se faiga un barullu, pero’l datu nun ye ciertu. A l’Academia de la Llingua recorten-y, sobre’l presupuestu de 2011, un 30%. ¡Cuasi nada! ¿Qué ocurre? Pues que cola llegada al poder del ínclitu señor Cascos, únicu Presidente Autonómicu que nun tuvo a bien recibir a la Presidenta de l’Academia, y eso que venía d’asturianista, con Cascos, digo, el recorte a l’Academia yera del 40%. Agora, col nuevu gobiernu, «sólo»-y quiten el 30. Esi ye’l famosu «aumentu» que se-y da a la másima institución llingüística del País. Apárome en desplicar too esto, por si dalgún despistáu piensa qu’hai favoritismos en favor d’una institución que, colos fallos que seguro que tuvo, siempre fue crítica a la hora defender los drechos llingüísticos de los asturianos, y por eso resultó incómoda. Les coses como son.
