close
UN NEGRU NA CASA BLANCA

UN NEGRU NA CASA BLANCA

2009-01-21Vicente Garcia Oliva243Visitas

Tamos tan amedranaos polo “políticamente correuto”, por mieu a que nun digan que somos esto o lo de más alló que, dacuando, les pallabres pierden el so verdaderu sentíu que ye’l d’espresar correutamente un conceutu.

Lo importante, el fechu realmente históricu, nun ye que llegue a ser Presidente de los Estaos Xuníos un “afroamericanu”, como dicen los medios de comunicación, sinón que llegara a selo un “negru”. Los negros fueron los esclavos, los negros fueron los marxinaos, a los negros se-yos quemaren les cases y se-yos punxeren milenta torgues (inclusu nel sen etimolóxicu de la pallabra) pa que nun estudiaren, pa que nun viaxaren colos blancos, pa que nun se mecieren con ellos… Y agora que por fin un negru, algamando la fin d’una cadena de lluches y sacrificios de toa una comunidá, llega a la Casa Blanca, dicen que ye un “afroamericanu” (por cierto, tamién hai afroamericanos blancos).

Los grandes lluchadores de la causa civil, unos coles armes y otros cola pallabra oral o escrita, reivindicaron la so condición de negros pa, asumiéndola, intentar normalizar la so situación de persones ensin etiqueta. Namás (y na menos) que la de ser humanu.

Dende la negritud de Shengor, hasta los Panteres Negres pasando por Martin Luther King, hai esa asunción de “lo negro” y esi llucha por tener los mesmos drechos civiles que los blancos. El nomamientu de Barak Obama como Presidente de los Estaos Xuníos supón l’algame d’esi suañu del que falaba King: la igualdá de blancos y negros. Eso ye lo importante, al marxen de cómo resulte’l so mandatu. Nun lo tapezamos con pallabres “políticamente correutes”

(Contactu: amtrancho@telecable.es)