L’ínclitu obispu de la diócesis d’Uviéu, señor Sanz Montes, aprovechó’l marcu covadonguista pa exercer el más ranciu «covadonguismu» nel so discursu del Día d’Asturies. Un marcu siempres esplotáu polos más enfotaos españolistes pa soltar les sos diatribes escontra’l que nun tea d’alcuerdu col: «España, Una, Grande y Libre», que recueye les meyores esencies franquistes.
Porque ye nidio que caún pue tener la so opinión sobre’l tema que seya, relixosu, económicu, políticu… y defendelu ellí onde vaiga. Pero tamién hai que tener en cuenta que determinaos cargos sociales torguen, en dalguna midida, la defensa enfotada de delles opiniones personales. Un d’ellos debiere ser el cargu d’Obispu, que tendría de ser l’Obispu de tolos asturianos (nel casu que nos ocupa), tanto los partidarios de la «Una, Grande y Llibre», como los que pudieren reclamar, nel so casu, la independencia d’Asturies, la so conversión n’Estáu Confederal o la xunión cola Comunidá Autónoma Canaria, si ye qu’esistiere dalguién que lo defendiere. En democracia, y siempres que nun s’atente escontra ella, cualquier opinión tien de poder espresase ensin ser insultáu.
Poro, falar de los que, pol motivu que fuere, defenden la independencia en términos como «los que insidian tejiendo secesiones», y llamar a una determinada forma de concebir l’Estáu como «un bien moral» paez que ye -como se diz popularmente- «mexar fuera’l bacín». Porque procesos secesionistes danse n’otres partes del mundu, con una naturalidá que ye d’agradecer. Qué dicir, sinón, de la posible secesión d’Escocia de la Gran Bretaña, pente medies d’un referendum. ¿Son los escoceses unos insidiosos o ye una opción política respetable, anque nun fuere compartible? O qué dicir del referendum en Quebec, o la división de Holanda en dos Estaos -Flamencos y Valones-. Pue qu’al señor obispu nun-y presten toes eses postures polítiques al rodiu de la secesión o non d’un Estáu, nesti casu’l nuestru, pero eso nun quier dicir qu’haya que les maldecir y bendecir a los qu’opinen a la escontra. Yo prefiero que Cataluña siga siendo parte del Estáu Español, sobre too porque creo qu’eso beneficia a Asturies, que ye lo que yo quiero, pero en nengún casu pienso qu’haya bonos y malos nesti asuntu, anque ta claro que, d’una parte y d’otra, háilos qu’empleguen la mala fe. Pero eso ye otru tema más personal que nun vien al cuentu.
Asina que-y pidiría’l señor Obispu d’Uviéu que dexe de caciplar y, cuando fale como tal, guarde les sos opiniones pa sí mesmu, o polo menos que tenga un mayor respetu a los que, dientro de les diverses opciones polítiques, nun piensen como él. Creo qu’eso ye lo qu’hai que facer como persona y como cura.
